ក្រុមហ៊ុនឯកជន LOA កាយដី គ្មានបច្ចេកទេសប៉ះខ្សែបណ្ដាញតង់ស្យុងមធ្យម (MV) ក្រោមដីដាច់ចរន្តអគ្គិសនីទាំងព្រឹក

ភ្នំពេញ៖ ដោយសារតែក្រុមហ៊ុនឯកជន LOA គ្មានបច្ចេកទេសត្រឹមត្រូវក្នុងការកាយដីដើម្បីចាក់បេតុងរៀបការ៉ូឡា បណ្ដាលឲ្យប៉ះខ្សែបណ្ដាញតង់ស្យុងមធ្យម (MV) ក្រោមដីធ្វើឲ្យដាច់ចរន្តអគ្គិសនីនៅតំបន់មួយចំនួនស្ថិតនៅ ខណ្ឌចំការមន និងខណ្ឌដូនពេញ ដែលនាំឲ្យពលរដ្ឋមានការក្តៅក្រហាយផងដែរ ។

យោងតាមប្រភពព័ត៍មានពីមន្រ្តីអគ្គីសនីកម្ពុជា បានឲ្យដឹងថា នៅថ្ងៃទី២១ ខែមីនាឆ្នាំ២០២០ វេលាម៉ោង០៨ និង២២នាទីព្រឹក មានករណីដាច់ចរន្តអគ្គិសនី ពីអនុស្ថានីយទី៩(GS9-F4) មូលហេតុដោយសារ មានក្រុមហ៊ុនឯកជន LOA កាយដី ដើម្បីចាក់បេតុងរៀបការ៉ូឡា ប៉ះខ្សែបណ្ដាញតង់ស្យុងមធ្យម (MV) ក្រោមដី ដែលបណ្តាលឲ្យដាច់ចរន្តអគ្គិសនី នៅតំបន់មួយចំនួនស្ថិតនៅ ១៖ ផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន, ២៖ សង្កាត់បឹងកេងកងទី១ ខណ្ឌបឹងកេងកង, ៣៖ សង្កាត់ចតុមុខ ខណ្ឌដូនពេញ រាជធានីភ្នំពេញ ។

មន្រ្តីអគ្គិសនីដដែល បានបញ្ជាក់ថា ក្រុមការងារបច្ចេកទេស បានធ្វើការប្តូរប្រភពផ្គត់ផ្គង់ភ្ជាប់ចរន្តអគ្គិសនី ជូនអតិថិជនមានចរន្តប្រើប្រាស់ឡើងវិញ នៅវេលាម៉ោង១០ និង០៥នាទីព្រឹកថ្ងៃដដែល ។

ក្នុងហេតុការណ៍នោះដែរមន្រ្តីជំនាញខាងអគ្គិសនីកម្ពុជា សូមអំពាវនាវដល់ប្រជាពលរដ្ឋ ឲ្យមានការប្រុងប្រយ័ត្នខ្ពស់ នៅពេលបំពេញការងារ នៅជិតគន្លងខ្សែបណ្ដាញអគ្គិសនីពីព្រោះអាចបណ្ដាល ឲ្យមានការរអាក់រអួល ក្នុងការផ្គត់ផ្គង់ចរន្តអគ្គិសនី និងគ្រោះថ្នាក់ជាយថាហេតុ ៕ស រស្មី