បើកម៉ូតូបត់ឆ្វេងត្រូវរថយន្ដមកពីក្រោយបុកស្លាប់ម្នាក់និងម្នាក់ទៀតរបួសធ្ងន់

កណ្ដាល៖ បុរស២នាក់ បើកម៉ូតូឌុបគ្នា រួចបត់ឆ្វេងមិនមើលក្រោយ ធ្វើឲ្យរថយន្ដមួយគ្រឿងធុនធំ មកពីក្រោយឈប់មិនទាន់បុក បណ្ដាលបុរសជាអ្នករួមដំណើរស្លាប់ និងអ្នកបើកបររងរបួសធ្ងន់ ។ ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង១៧និង៣០នាទី ថ្ងៃទី៦ ខែមេសា ឆ្នាំ២០២០ លើកំណាត់ផ្លូវជាតិលេខ៦ ចន្លោះគីឡូម៉ែតលេខ៣៦-៣៧ចំណុចភូមិស្វាយជ្រុំ ឃុំព្រែកដំបង ស្រុកមុខកំពូល ខេត្តកណ្ដាល ។
មន្រ្ដីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះស្លាប់ឈ្មោះ ញឹម គីមហ័ង ភេទប្រុស អាយុ៣៤ឆ្នាំ មានទីលំនៅភូមិជ្រោយក្របៅទី២ ឃុំរកាអារ ស្រុកកងមាស ខេត្តកំពង់ចាម (ជាអ្នករួមដំណើរ) រីឯជនរងគ្រោះរងរបួសធ្ងន់ឈ្មោះ ចាប ឡាច ភេទប្រុសអាយុ២៩ឆ្នាំ មានទីលំនៅភូមិតានន ឃុំដូង ស្រុកបាទី ខេត្តតាកែវ ជាអ្នកបើកបរម៉ូតូម៉ាកហុងដាឌ្រីម ធុនសេ125 ពណ៌ខ្មៅ ពាក់ស្លាកលេខ ភ្នំពេញ1IH-5493 ។ ចំណែកភាគីខាងរថយន្ដម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3B-7534 បើកបរដោយជនមិនស្គាល់អត្ដសញ្ញាណ ( រត់គេចបាត់ស្រមោល)។
ប្រភពដដែលបន្ដថា នៅមុនពេលកើតហេតុ សាក្សីបានឃើញជនរងគ្រោះទាំង២នាក់ បើកបរម៉ូតូឌុបគ្នា តាមបណ្ដោយផ្លូវជាតិលេខ៦ ក្នុងទិសដៅពីជើងទៅត្បូង លុះមកដល់ចំណុចកើតហេតុ អ្នកបើកបរម៉ូតូក៏បើកបត់ឆ្វេងឆ្លងផ្លូវ ដោយពុំបានមើលក្រោយនោះទេ ភ្លាមនោះក៏ត្រូវរថយន្ដខាងលើ បើកស្របគ្នាមកពីក្រោយឈប់មិនទាន់ ក៏បុកម៉ូតូជនរងគ្រោះ បណ្ដាលឲ្យអ្នករួមដំណើរម្នាក់ស្លាប់ និងអ្នកបើកបររងរបួសធ្ងន់ ។
ក្រោយពីមានហេតុការណ៍កើតឡើង ជនរងគ្រោះរបួសធ្ងន់ ត្រូវបានរថយន្ដសាមុយដឹកបញ្ជូនទៅសង្រ្គោះនៅមន្ទីរពេទ្យរាជធានីភ្នំពេញ ។ ចំណែកមធ្យោបាយពាក់ព័ន្ធត្រូវបានសមត្ថកិច្ចជំនាញធ្វើការពិនិត្យ វាស់វែង រួចកសាងឯកសារដកហូតយកទៅរក្សាទុកនៅអធិការដ្ឋាននគរបាលស្រុក ចាត់ការតាមនីតិវិធីច្បាប់ ។ ដោយឡែកសាកសពជនរងគ្រោះ ត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕ដោយ៖ស្អាង ជ័យ