សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ ទំនាស់រវាងក្មេងទំនើង២ក្រុមបណ្តាលឲ្យភាគីម្ខាងរងរបួសធ្ងន់២នាក់ ចំណែកភាគីម្ខាងជាអ្នកបង្ករត់គេចខ្លួនបាត់ ។
ហេតុការណ៍នេះ បានកើតឡើង នៅវេលាម៉ោង៥និង៣០នាទីល្ងាចថ្ងៃទី១៣ខែមេសាឆ្នាំ២០២០ នៅចំណុចអាងពលសេនា ស្ថិតក្នុងភូមិដូនណូយ ឃុំទ្រាស ស្រុកស្វាយចេក ខេត្តបន្ទាយមានជ័យ ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានឲ្យដឹងថានៅវេលាម៉ោង៥និង៣០នាទីល្ងាចថ្ងៃទី១៣ ខែមេសា ឆ្នាំ២០២០ មានក្រុមក្មេង២ក្រុមមកលេងនៅអាងពលសេនា ក្នុងភូមិដូនណូយ ឃុំទ្រាស ស្រុកស្វាយចេក។បន្ទាប់មកពួកគេមានទំនាស់ពាក្យសំដីគ្នា រហូតបានឈានដល់ប្រើអំពើហឹង្សាវាយតប់គ្នាទៅវិញទៅមកហើយក្នុងនោះក្រុមម្ខាង២នាក់បានរងរបួសដែលមានឈ្មោះ សិច សាន់ ភេទប្រុសអាយុ១៩ឆ្នាំ របួសក្បាលផ្នែកខាងស្តាំនិងម្នាក់ទៀតឈ្មោះ នួន ណង ភេទប្រុសអាយុ២២ឆ្នាំ រងរបួសមាត់និងស្មា។ យុវជនទាំងពីរនាក់រស់នៅភូមិដូនណូយឃុំទ្រាស ស្រុកស្វាយចេក។ចំណែកជនបង្ក ឈ្មោះងៀន ង៉ាន់ភេទប្រុសអាយុ ២៤ ឆ្នាំរស់នៅភូមិពន្លៃថ្មីឃុំទ្រាសស្រុកស្វាយចេកនិងបក្ខពួកម្នាក់ទៀត ក្រោយធ្វើសកម្មភាពរួចបាននាំគ្នារត់គេចខ្លួនបាត់។មកដល់ពេលនេះកម្លាំងនគរបាលកំពុងស្រាវជ្រាវរកចាប់ខ្លួនជនដៃដល់ទាំង២នាក់។រីឯក្រុមអ្នករងរបួសត្រូវបាននាំយកទៅព្យាបាលនៅមន្ទីរពេទ្យបង្អែកស្រុកស្វាយចេកភ្លាមៗផងដែរ៕ដោយ៖ប្រាថ្នា
