ព័ត៌មានទាន់ហេតុការណ៍៖

កូរ៉េខាងត្បូង អត្រាឆ្លងជំងឺ COVID-19 ធ្លាក់ចុះកាន់តែទាបមែនទែនដល់ ៩ករណីក្នុងមួយថ្ងៃ

ចែករំលែក៖

ទីក្រុងសេអ៊ូល៖ នាព្រឹកថ្ងៃអង្គារ ទី២១ ខែមេសា ឆ្នាំ២០២០ តាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ បញ្ជាក់ថា ប្រទេសកូរ៉េខាងត្បូង បានរកឃើញអ្នកឆ្លងជំងឺ COVID-19 ថ្មី ត្រឹមតែ ៩ករណីប៉ុណ្ណោះ នៅក្នុងរយៈពេល ២៤ម៉ោងកន្លងទៅនេះ ដែលត្រូវបានចាត់ទុកជាអត្រាឆ្លងប្រចាំថ្ងៃ ទាបបំផុត ខណៈករណីឆ្លងសរុបកើនឡើងដល់ ១០,៦៨៣ករណី ។

សម្រាប់អត្រាឆ្លងប្រចាំថ្ងៃស្ថិតក្នុងរង្វង់ក្រោម ២០ករណីបែបនេះ បានកើតមានឡើង ០៤ថ្ងៃជាប់ៗគ្នាមកហើយ ដោយប្រការនេះបានបង្ហាញថា អត្រាឆ្លងថ្មីៗនៃ COVID-19 នៅកូរ៉េខាងត្បូងកាន់តែធូរស្រាលខ្លាំងឡើងៗ។ អ្វីដែលគួរឲ្យចាប់អារម្មណ៍បន្ថែមទៀតនោះ នៅក្នុងចំណោមករណីរកឃើញអ្នកផ្ទុក COVID-19 ទាំង ១០នាក់ខាងលើនេះ គឺមាន ០៥នាក់ជាប្រភេទករណីនាំចូល ដែលបានធ្វើឲ្យចំនួនករណីនាំចូលជំងឺនេះ នៅកូរ៉េខាងត្បូង កើនឡើងដល់ ១,០១១នាក់។

គួរបញ្ជាក់ថា កាលពីថ្ងៃចន្ទម្សិលមិញនេះ អ្នកជំងឺ COVID-19 ម្នាក់ទៀតផងដែរបានបាត់បង់ជីវិត ដែលនាំឲ្យចំនួនអ្នកស្លាប់សរុប នៅកូរ៉េខាងត្បូងកើនឡើងដល់ ២៣៧នាក់ ឬស្មើនឹងអត្រាស្លាប់ ២.២២ភាគរយ ។

ដោយឡែកងាកទៅមើលចំនួនអ្នកជាសះស្បើយវិញ នៅថ្ងៃចន្ទដដែលអ្នកជំងឺ ៩៩នាក់ទៀតត្រូវបានអនុញ្ញាតឲ្យចេញពីមន្ទីរពេទ្យ ដែលប្រការនេះបាននាំឲ្យចំនួនអ្នកជាសះស្បើយពី COVID-19 សរុបនៅកូរ៉េខាងត្បូងកើនដល់ ៨,២១៣នាក់៕ដោយ៖ ស តារា

 


ចែករំលែក៖