សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោក ផៃ ស៊ីផាន រដ្ឋមន្រ្តី ប្រតិភូអប នាយករដ្ឋមន្ត្រី និងជាប្រធានក្រុមអ្នកនាំពាក្យរបស់រាជរដ្ឋាភិបាលកម្ពុជាបានគោរពស្នើសុំការគាំទ្រពី លោករដ្ឋមន្រ្តី ខៀវ កាញារីទ្ធ រដ្ឋមន្ត្រីក្រសួងព័ត៌មានក្នុងការរៀបចំសន្និសីទសារព័ត៌មាន នៅថ្នាក់ក្រោមជាតិវិញម្តង ព្រោះថា ការរៀបចំសន្និសីទសារព័ត៌មានស្តីពីវឌ្ឍនភាព និងទិសដៅ ការងារបន្តរបស់ក្រសួង ស្ថាប័ន សម្រាប់ស្ថាប័នជាតិ បានបញ្ចប់ទៅហើយ។
ក្នុងជំនួបពិភាក្សាជាមួយ លោក រដ្ឋមន្រ្តី ខៀវ កាញារីទ្ធ រដ្ឋមន្ត្រីក្រសួងព័ត៌មាននៅថ្ងៃទី២៤ខែមេសាឆ្នាំ២០២០នេះលោក ផៃ ស៊ីផាន រដ្ឋមន្រ្តី ប្រតិភូអបនាយករដ្ឋមន្ត្រី បានមានប្រសាសន៍ថា អង្គភាពអ្នកនាំពាក្យនឹងរៀបចំសន្និសីទសារព័ត៌មានសម្រាប់ថ្នាក់ក្រោមជាតិដែលនិយាយអំពីភាពរីកចម្រើននិងការបង្ហាញពីសមិទ្ធិផលក៏ដូចជាទិសដៅការងាររបស់រដ្ឋបាលថ្នាក់ក្រោមជាតិនីមួយៗ។
ប្រតិភូអបនាយករដ្ឋមន្ត្រី បានបញ្ជាក់ថា ការរៀបចំជាសន្និសីទសារព័ត៌មាន ដើម្បីផ្លាស់ប្តូរឥរិយាបថរបស់ប្រជាពលរដ្ឋដែលជាអ្នកទទួលព័ត៌មានឱ្យបានយល់និងដឹងព័ត៌មានកាន់តែច្រើន ហើយអាចលើកជាចម្ងល់សួរទៅអង្គភាព ក្រសួង ស្ថាប័ន ជំនាញ នៅក្នុងវិស័យនីមួយៗ។ ក្រៅពីនេះក៏បានធ្វើការបណ្តុះបណ្តាល ដល់អ្នកសារព័ត៌មាន និងមន្រ្តី អ្នកនាំពាក្យទាំងនៅថ្នាក់ជាតិ ថ្នាក់ក្រោមជាតិ ថែមទៀតផងដែរ។
ជាការឆ្លើយតបលោកខៀវ កាញារីទ្ធ រដ្ឋមន្រ្តីក្រសួងព័ត៌មានបានសំដែងនូវការគាំទ្រចំពោះការរៀបចំសន្និសីទសារព័ត៌មានសម្រាប់ខេត្តនីមួយៗក្នុងការបង្ហាញពីការងារដែលសម្រេចបានរួមទាំងទិសដៅដែលត្រូវបន្តធ្វើ។លោក ខៀវ កាញារីទ្ធ បានបញ្ជាក់ថា ដើម្បីឱ្យដំណើរការរៀបចំសន្និសីទសារព័ត៌មាន នៅតាមបណ្តាខេត្ត ទទួលបានជោគជ័យគឺជាជំហានដំបូង អង្គភាពអ្នកនាំពាក្យរាជរដ្ឋាភិបាលត្រូវគោរពស្នើសុំការគាំទ្រពីសំណាក់សម្តេច ក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តី ក្រសួងមហាផ្ទៃ ព្រោះថា សម្រាប់ថ្នាក់ក្រោមជាតិ គឺមានប្រកាសរួមមួយរវាង ក្រសួងព័ត៌មាន និងក្រសួងមហាផ្ទៃ ស្តីការបង្កើតក្រុមការងារអ្នកនាំពាក្យដើម្បីងាយស្រួលក្នុងការបំពេញកិច្ចការងារ បានទៅដោយរលូន និងទទួលជោគជ័យក្នុងកិច្ចការងារបន្តទៅមុខទៀត៕ដោយ៖ហេង សូរិយា
