សារព័ត៌មាន នគរវត្ត តែងតែនាំមុខគេជានិច្ច
ប្រទេសចិន៖ ខណៈដែលជំងឺ COVID-19 បានចម្លងទៅកាន់មនុស្សជាង២,៩លាននាក់ ជាច្រើនប្រទេសនៅជុំវិញពិភពលោក និងមានតម្រូវការចាំបាច់សម្រាប់ឧបករណ៍ការពារខ្លួន ដែលរួមមានម៉ាស់ផងនោះ ហើយប្រទេសទាំងអស់ បានងាកទៅរកប្រទេសចិន ដើម្បីបញ្ជាទិញឧបករណ៍ទាំងអស់នោះ ។ ប៉ុន្តែគេឃើញមានការត្អូញត្អែរថា ម៉ាស់ និងឧបករណ៍ដទៃទៀតដែលនាំចូលពីចិន មិនអាចប្រើការបានជាពិសេសឧបករណ៍ សម្រាប់ប្រើឲ្យបុគ្គលិកពេទ្យ និងអ្នកងាយរងគ្រោះដោយសារជំងឺCOVID-19នោះ ។
ជាក់ស្តែងរដ្ឋាភិបាលចិន នៅថ្ងៃទី២៦ ខែមេសា ឆ្នាំ២០២០ បានរឹបអូសម៉ាស់គ្មានគុណភាពជាង៨៩លានសន្លឹក ក្រោយធ្វើឡើងស្របពេលចិនទទួលរងការរិះគន់យ៉ាងដំណំបន្ទាប់ពីផលិតផលម៉ាស់ និងឧបករណ៍ការពារខ្លួនដែលនាំចេញទៅជុំវិញពិភពលោកមិនអាចប្រើការបាន ឬអន់គុណភាព ។
លោកស្រី Gan Lin អគ្គនាយករង រដ្ឋបាលរដ្ឋនៃបទបញ្ញត្តិទីផ្សារ បាននិយាយនៅក្នុងសន្និសីទសារព័ត៌មានថា ត្រឹមថ្ងៃទី២៥ ខែមេសានេះចិនបានត្រួតពិនិត្យកន្លែងអាជីវកម្មចំនួន១៦លានទីតាំង បានរឹបអូសម៉ាស់ចំនួន៨៩លានសន្លឹក និងឧបករណ៍ការពារខ្លួនចំនួន៤១៨,០០០សម្រាប់។ បន្ថែមពីនេះ អាជ្ញាធរក៏បានរឹបអូសសារធាតុសម្លាប់មេរោគ ដែលមានតម្លៃ១,១លានដុល្លារអាមេរិកផងដែរ។
ក្នុងបំណងលុបបំបាត់ផលិតផលគ្មានគុណភាព ក្រសួងពាណិជ្ជកម្មចិន នៅថ្ងៃទី២៦ ខែមេសានេះ បានចេញវិធានដែលតម្រូវឲ្យម៉ាស់ ដែលមិនប្រើសម្រាប់គោលដៅវេជ្ជសាស្ត្រក៏ដោយ ត្រូវស្របតាមបទដ្ឋានជាតិ និងអន្តរជាតិ។ បន្ថែមពីនេះអ្នកនាំចេញផលិតផលទាំងនេះ ក៏ត្រូវមានសេចក្តីប្រកាសបង្ហាញថា ផលិតផលដែលនាំចេញ ត្រូវតាមលក្ខខណ្ឌសុវត្ថិភាពរបស់ប្រទេសគោលដៅ ។
ការរឹតបន្តឹងវិធានសុវត្ថិភាព ធ្វើឡើងដោយរដ្ឋាភិបាលចិនបែបនេះ កើតឡើងបន្ទាប់ពីប្រទេសមួយចំនួនដូចជា អេស្ប៉ាញ ហូឡង់ ឆែក និងតួកគី បង្ខំចិត្តប្រមូលយកមកវិញនូវម៉ាស់ និងឧបករណ៍ការពារខ្លួន ដែលមិនអាចប្រើការបានរាប់សែនសម្រាប់។
ដោយឡែករដ្ឋាភិបាលកាណាដា កាលពីសប្តាហ៍មុន បាននិយាយថា ម៉ាស់ជាង១លានសន្លឹកដែលនាំចូលពីចិន មិនអាចបំពេញតាមបទដ្ឋានត្រឹមត្រូវ សម្រាប់អ្នជំនាញថែទាំសុខភាព ។ចំណែកឯ រដ្ឋាភិបាលហូឡង់វិញ បានប្រមូលម៉ាស់កន្លះលានសន្លឹក បន្ទាប់ពីម៉ាស់ទាំងអស់នោះ មិនអាចពាក់ត្រូវនឹងមុខ ឬឧបករណ៍ចម្រោះរបស់ម៉ាសមិនដំណើការ។
យោងតាមតួលេខផ្លួវការ ផលិតកម្មម៉ាស់នៅប្រទេសចិន បានកើនឡើងលើសពី១១៦លានម៉ាស់ក្នុងមួយថ្ងៃ។ ក្នុងរយៈពេល២ខែចុងក្រោយអាជីវកម្មផលិតម៉ាសថ្មី មានចំនួន៨,៩៥០ទីតាំង។
លោក Jin Hai មន្ត្រីគយចិន បាននិយយថា បើទោះជាមានការចុះបង្ក្រាបនៅទូទាំងប្រទេសក៏ដោយ អាជីវកម្មផលិតឧបករណ៍វេជ្ជសាស្ត្រដែលគ្មានច្បាប់អនុញ្ញាត នៅតែបន្តមានដោយសារតែអាចរកលុយបានយ៉ាងរហ័ស។ ចាប់តាំងពីពាក់កណ្តាលខែមេសាមក មន្ត្រីកំពង់ផែចិនបានរឹបអូសម៉ាស់ដែលមិនអាចប្រើបានចំនួន ៣១.៦លានម៉ាស់ និងសម្លៀកបំពាក់សម្រាប់ការពារខ្លួនចំនួន ៥០៩,០០០ឈុត៕ដោយ៖ស តារា
