សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ បុរសម្នាក់បានរងរបួសធ្ងន់ បន្ទាប់ពីបានយកផាវទៅកែច្នៃធ្វើគ្រាប់បែក ដើម្បីយកទៅបោកត្រីក្នុងស្ទឹង តែខុសបច្ចេកទេសក៏ផ្ទុះឡើងបណ្ដាលឱ្យរបួសខ្ទេចដៃម្ខាង ។
ឧប្បត្តិហេតុនេះបានកើតឡើងកាលពីវេលាម៉ោង១និង៣០នាទីរសៀលថ្ងៃទី៣០ មេសា ឆ្នាំ២០២០នៅចំណុចភូមិ ឃុំ ស្រុកសំឡូត ខេត្តបាត់ដំបង។
មន្ត្រីកងរាជអាវុធហត្ថស្រុកសំឡូតបានឱ្យដឹងថា បុរសនោះ ឈ្មោះ ម៉េង សុខចំរើន អាយុ៣៨ឆ្នាំ រស់នៅភូមិ ឃុំ កើតហេតុខាងលើ។ មុនពេលកើតហេតុបុរសនេះ បានយកផាវដែលមានរាងមូលធំៗដូចគ្រាប់បែក ទៅកែច្នៃធ្វើជាគ្រាប់បែក ហើយទំនងជាខុសបច្ចេកទេសភ្លាត់ស្នៀត ធ្វើឱ្យផ្ទុះលាន់កក្រើកដី និងនិងធ្វើឱ្យបុរសនេះរបួសដៃខាងស្ដាំម្ខាងខ្ទេចតែម្តង ។
ប្រភពដដែលបានឲ្យដឹងទៀតថាក្រោយកើតហេតុ ក្រុមក្រុមគ្រួសារបានដឹកបុរសរងគ្រោះទៅកាន់មណ្ឌលសុខភាពភ្លាមៗដើម្បីសង្គ្រោះបឋមហើយក្រោយមកដោយសាររបួសធ្ងន់ធ្ងរពេកក្រុមគ្រួសារបញ្ជូនបន្តទៅកាន់មន្ទីរពេទ្យខេត្ត។
ដោយឡែកបើតាមប្រភពពីមន្ត្រីមូលដ្ឋានក៏ដូចជាប្រជាពលរដ្ឋវិញបានបង្ហើបឱ្យដឹងថា ជនរងគ្រោះរងរបួសស្ទើរដាច់ដៃស្ដាំម្ខាងដោយសារគាត់ទិញផាវគ្រាប់បែកទៅកែច្នៃយកទៅបោកត្រីតាមស្ទឹង។លុះពេលគាត់កំពុងកែច្នៃខុសបច្ចេកទេស ស្រាប់តែឮស្នូរសំឡេងផ្ទុះលាន់ក្ឌាំងតែម្តង។ ភ្លាមនោះគេនាំគ្នាទៅមើលស្រាប់តែឃើញបុរសនេះស្រែកឱ្យគេជួយ ជាមួយនឹងដៃស្ដាំម្ខាងហូរឈាមកក្លាក់រងរបួសយ៉ាងធ្ងន់ធ្ងរ ហើយត្រូវបានក្រុមគ្រួសារដឹកទៅកាន់មន្ទីរពេទ្យភ្លាមៗ៕ដោយ÷ប្រាថ្នា
