ព្រះសីហនុ ៖ សាកសពបុរសម្នាក់ ត្រូវគេប្រទះឃើញស្លាប់ដោយមានខ្សែចងជាប់ ក ជាមួយនិងមែកដើមព្រីងក្នុងព្រៃ ជាប់ផ្លូវជាតិលេខ៤ ត្រង់ចន្លោះបង្គោលគីឡូម៉ែត្រលេខ២១៣/២១៤។ ហេតុការណ៍នេះ បានកើតមានឡើងនៅម៉ោង ៧ព្រឹក ថ្ងៃទី១ ខែឧសភា ឆ្នាំ២០២០ ស្ថិតនៅ ចំណុចច្រកចូលចម្ការខ្នុរ ក្នុងភូមិចំណោទរាម ឃុំបិតត្រាំង ស្រុកព្រៃនប់ ខេត្តព្រះសីហនុ។
សមត្ថកិច្ចមូលដ្ឋានដែលបានចុះទៅពិនិត្យនៅកន្លែងកើតហេតុបាននិយាយថា សពជនរងគ្រោះ គេមិនទាន់ស្គាល់ឈ្មោះនោះទេ ដោយសពជាមនុស្ស ប្រុស ពាក់អាវយឺត ស ដៃខ្លី ស្លៀកខោខោវប៊យ បានយកខ្សែនីឡុងសំប៉ែតបន្ទះប៉ុនមេដៃពណ៌ខ្មៅ(ដូចខ្សែកាតាបស្ពាយ) ចង ក ភ្ជាប់ទៅនឹងដើមព្រីង បណ្តាលឲ្យស្លាប់។
សមត្ថកិច្ចបានឲ្យដឹងទៀតថា យោងតាមការសាកសួរ ព័ត៌មានពីប្រជាពលរដ្ឋ រស់នៅក្បែរចំណុចកើតហេតុបានឲ្យដឹងថា កាលពីម្សិលមិញ( ថ្ងៃទី៣០ ខែ០៤ ឆ្នាំ២០២០) ពួកគាត់ឃើញជនរងគ្រោះខាងលើ បានដើរទៅមកៗ កន្លែងកើតហេតុខាងលើ ហើយនិយាយតែម្នាក់ឯង ហាក់បីដូចជាមានសតិមិនល្អ។ លុះព្រឹកឡើងស្រាប់តែឃើញគាត់ចងកសម្លាប់ខ្លួន។ បច្ចុប្បន្នសាកសពខាងលើពុំទាន់ស្គាល់អត្តសញ្ញាណនេះ សមត្ថកិច្ចបានដឹកយកទៅតម្កល់ទុកនៅវត្តបិតត្រាំងបន្ទាប់ពីធ្វើការពិនិត្យរួច៕ឆ្លាម សមុទ្រ
សារព័ត៌មាន នគរវត្ត តែងតែនាំមុខគេជានិច្ច
