នគរបាលប៉ុស្តិ៍ភ្នំពេញថ្មី ឃាត់ខ្លួនជនសង្ស័យ២នាក់ ពាក់ព័ន្ធករណីគ្រឿងញៀន

ភ្នំពេញ៖ កម្លាំងនគរបាលប៉ុស្តិ៍ភ្នំពេញថ្មី បានឃាត់ខ្លួនជនសង្ស័យ២នាក់ក្រោយឆែកឆេររកឃើញថ្នាំញៀនជាប់ខ្លួន កាលពីវេលាម៉ោង០១និង៣០នាទីរំលោងអាធ្រាតឈានចូលថ្ងៃ០៨ខែឧសភាឆ្នាំ២០២០តាមបណ្តោយផ្លូវលេខ១០០៣ ភូមិភ្នំពេញថ្មី សង្កាត់ភ្នំពេញ ខណ្ឌសែនសុខ។

ជនសង្ស័យទាំង២នាក់នេះ ទី១ឈ្មោះហួន បាក់ហៃ ភេទប្រុសអាយុ២៤ឆ្នាំមុខរបរមិនពិតប្រាកដ នឹងទី២ឈ្មោះ ខេ ជាសិន ភេទប្រុសអាយុ៣០ឆ្នាំជនជាតិសេរីលង្កា មុខរបរមិនពិតប្រាកដ។

ទាំងពីរនាក់ខាងលើ ស្នាក់នៅបន្ទប់ជួល ភូមិដំណាក់ សង្កាត់គោកឃ្លាងខណ្ឌសែនសុខ ។

លោកវរសេនីយ៍ត្រី វ៉ាន់ សារ៉េត នាយនគរបាលប៉ុស្តិ៍ភ្នំពេញថ្មីបានឲ្យដឹងថាការឃាត់ខ្លួនជនសង្ស័យទាំងពីរនាក់ខាងលើនេះ គឺកម្លាំងរបស់លោកបានធ្វើការល្បាតក្នុងមូលដ្ឋាន ដើម្បីទប់ស្កាត់បទល្មើសនាៗ ខណៈនោះក៏ប្រទះឃើញពួកគេជិះម៉ូតូ១គ្រឿងម៉ាកហុងដាគុបជ្រុង ពណ៍ទឹកបិច ពាក់ស្លាកលេខ ភ្នំពេញ1C.1027 ដោយមានការសង្ស័យក៍ហៅឈប់ដើម្បីត្រួតពិនិត្យហើយឆែកឃើញមានថ្នាំញៀនចំនួន០២កញ្ចប់តូចទើបឃាត់ខ្លួនតែម្តង។

បច្ចុប្បន្នជនសង្ស័យ រួមនឹងវត្ថុតាងកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់ ៕ដោយ៖ ចន្ទ លីហ្សា