សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ ៖ មុខសញ្ញាពាក់ព័ន្ធ គ្រឿងញៀន២នាក់ ត្រូវកម្លាំងនគរបាល ស្រុកគីរីវង់ចាប់ឃាត់ខ្លួនខណៈកំពុងចុះល្បាតតាម គោលដៅក្នុងមូលដ្ឋាននឹងប្រទះឃើញគួរឲ្យសង្ស័យ។
ជនសង្ស័យ ត្រូវបានឃាត់ខ្លួននៅថ្ងៃទី០៧ ខែឧសភា ឆ្នាំ២០២០ វេលាម៉ោង១៤និង១០នាទី ដោយកម្លាំងអធិការនគរបាលស្រុកគីរីវង់ ដែលដឹកនាំដោយលោកវរសេនីយ៍ឯក យុគ សារ៉ាត់ អធិការនគរបាលស្រុក នៅចំណុចប្រឡាយទឹកខាងកើតវត្តពោធិអង្គ ស្ថិតនៅភូមិរាមអណ្តើក ឃុំរាមអណ្តើក ស្រុកគិរីវង់ ខេត្តតាកែវ។ ជនសង្ស័យមាន ទី១. ឈ្មោះ ឈី រស់ជាតិ(ហៅពេជ្រ) ភេទប្រុស អាយុ២១ឆ្នាំ ទីលំនៅភូមិត្រពាំងខ្ចៅ ឃុំរាមអណ្តើក ស្រុកគីរីវង់និង ទី២. ឈ្មោះ ថេត រ៉ាមបូ (ហៅគ្រុល) ) ភេទប្រុស អាយុ១៤ឆ្នាំ ទីលំនៅភូមិរាមអណ្តើក ឃុំរាមអណ្តើក ស្រុកគីរីវង់ ខេត្តតាកែវ។
លោកអធិការស្រុកគីរីវង់បានឲ្យដឹងថា ពេលដែលកម្លាំងកំពុងតែល្បាតតាមគោលដៅក៏ប្រទះឃើញមុខសញ្ញាខាងលើ ជាមុខសញ្ញាចាស់ ដែលសមត្ថកិច្ចធ្លាប់បានកំណត់ពីមុនមកទើបឈានដល់ ការឃាត់ខ្លួន នឹងដកហូតបានវត្ថុតាង មានថ្នាំញៀនចំនួន០២កញ្ចប់តូច ម៉ូតូ០១គ្រឿងម៉ាកអិចសង់ទ័រ, ទូរស័ព្ទដៃ០១គ្រឿង ពណ៌ខ្មៅ។
បច្ចុប្បន្នជនសង្ស័យនិងវត្ថុតាងត្រូវបានកម្លាំងជំនាញធ្វើការសាកសួរ និងកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធី៕ដោយ៖នរិន្រ្ទ
