សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក Steve Linick ត្រូវបានលោកប្រធានាធិបតី ដូណាល់ ត្រាំ បណ្ដេញចេញពីតំណែងអធិការនៃអគ្គអធិការកិច្ចក្រសួងការបរទេសនៅយប់ថ្ងៃទី១៥ ខែឧសភា ឆ្នាំ២០២០នេះ បន្ទាប់បានបើកការស៊ើបអង្កេតលើប្រមុខការទូត ម៉ៃ ប៉ុមប៉េអូ ដែលជាប់សង្ស័យថា បានប្រើប្រាស់មន្ត្រីរដ្ឋក្នុងកិច្ចការផ្ទាល់ខ្លួន ។ លោក Linick ជាមន្ត្រីត្រួតពិនិត្យកិច្ចការស្ថាប័នរដ្ឋចុងក្រោយគេមួយដែលលោក ត្រាំ បញ្ចប់តំណែងដោយសារការបំពេញភារកិច្ចរបស់ខ្លួន ។ ប៉ុន្តែការបញ្ចប់តំណែងមន្ត្រីអធិការកិច្ចក្រសួងការបរទេសអាមេរិករូបនេះ ត្រូវបានសមាជិកសភាបក្សប្រជាធិបតេយ្យ បានរិះគន់ការសម្រេចចិត្តនេះ ដោយហៅថា ជាការសងសឹកខុសច្បាប់។
លោក Eliot Engel ប្រធានគណៈកម្មាធិការកិច្ចការបរទេសសភាតំណាងអាមេរិក និយាយថា លោក Linick កំពុងស៊ើបអង្កេតលើរដ្ឋមន្ត្រីការបរទេស ម៉ៃ ប៉ុមប៉េអូ ។ បើតាមទីភ្នាក់ងារព័ត៌មាន AFP លោក Engel និយាយក្នុងសេចក្ដីថ្លែងការណ៍របស់ខ្លួន ថា ការបញ្ចប់តំណែងលោក Linick ស្របពេលការស៊ើបអង្កេតបែបនេះ ស្ដែងពីការសងសឹកមិនស្របច្បាប់។
ប្រភពព័ត៌មានដដែលបន្តថា លោក Linick បានបើកការស៊ើបអង្កេតលើពាក្យបណ្ដឹងមួយប្រឆាំងលោក ប៉ុមប៉េអូ ជុំវិញការប្រើប្រាស់មន្ត្រីម្នាក់ដែលត្រូវបានតែងតាំងឲ្យបម្រើការជាមួយលោកឲ្យធ្វើការងារផ្ទាល់ខ្លួនសម្រាប់លោក ប៉ុមប៉េអូ និងភរិយាអ្នកស្រី ស៊ូសាន ប៉ុមប៉េអូ ។ កន្លងទៅ លោក ប៉ុមប៉េអូ ក៏ធ្លាប់ធ្វើឲ្យភ្ញាក់ផ្អើលខ្លាំងដែរ នៅពេលលោកយកភរិយាធ្វើដំណើរជុំវិញពិភពលោកដោយប្រើប្រាស់យន្តហោះរដ្ឋ។
កាលពីឆ្នាំមុន ទូរទស្សន៍ CNN បានស្រង់សម្ដីមន្ត្រីម្នាក់ដែលបានទម្លាយព័ត៌មានថា បុគ្គលិកម្នាក់នៃអង្គភាពសន្តិសុខការទូតដែលជាធម្មតាការពារស្ថានទូត និងក្រសួងការបរទេស ត្រូវបានចាត់តាំងឲ្យបំពេញភារកិច្ចមិនធម្មតាសម្រាប់លោក ប៉ុមប៉េអូ ដូចជាការកើបលាកឆ្កែ និងដឹកអាហារជាដើម។
ក្រសួងការបរទេសអាមេរិក បានបញ្ជាក់ពីការបណ្ដេញលោក Linick ចេញពីតំណែង ប៉ុន្តែមិនបានផ្ដល់មូលហេតុឡើយ។ អ្នកដែលត្រូវជំនួសវិញ គឺលោក Stephen Akard អតីតជំនួយការអនុប្រធានាធិបតី ម៉ៃ ផេន មកពីរដ្ឋ Indiana និងជាប្រធានការិយាល័យបេសកកម្មបរទេស ដែលទទួលបន្ទុកទំនាក់ទំនងជាមួយស្ថានទូតបរទេសប្រចាំវ៉ាស៊ីនតោន។
សូមបញ្ជាក់ថា លោក ប៉ុមប៉េអូ ជាមនុស្សជំនិតលោក ត្រាំ ក្នុងរដ្ឋាភិបាលដែលសម្បូរដោយមន្ត្រីដែលទទួលបានការតែងតាំងតាមនយោបាយជាជាងបទពិសោធការងារ។ ជាអតីតនាយកទីភ្នាក់ងារស៊ើបអង្កេតកណ្ដាល លោក ប៉ុមប៉េអូ អនុវត្តដោយឥតងាករេគោលនយោបាយការបរទេសដ៏ចម្រូងចម្រាស់របស់លោក ត្រាំ មិនថាវិបត្តិអ៊ីស្រាអែល-ប៉ាឡេស្ទីន ឬសំណុំរឿងអុីរ៉ង់ឡើយ៕ដោយ៖ស តារា
