សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ យ៉ាងហោចសត្វពាហនៈ(គោ) ១ក្បាលបានងាប់កណ្ដាលទ្រូងផ្លូវ និងមនុស្សចំនួន ៣នាក់បានរងរបួសរដូករណែល(ធ្ងន់) ក្នុងករណីគ្រោះថ្នាក់ចរាចរណ៍បីលើក នៅខេត្តពោធិ៍សាត់ ។
ប្រភពព័ត៌មានពីនគរបាលផ្នែកសណ្ដាប់ធ្នាប់នៃអធិការដ្ឋាននគរបាលស្រុកបាកាន ស្រុកក្រគរ និងក្រុងពោធិ៍សាត់ប្រាប់ថា នាយប់ថ្ងៃអង្គារ ១៣រោច ខែពិសាខ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៩ ខែឧសភា ឆ្នាំ២០២០ នៅលើកំណាត់ផ្លូវជាតិលេខ៥ ស្ថិតក្នុងភូមិអន្លង់មាន ឃុំស្នាមព្រះ ស្រុកបាកាន មានករណីគ្រោះថ្នាក់ចរាចរណ៍មួយបានកើតឡើង រវាងអ្នកជិះម៉ូតូ និងម៉ូតូច្រាស់ទិសគ្នា បណ្ដាលឲ្យរងរបួសធ្ងន់ទាំងសងខាង ។
ប្រភពខាងលើបន្តថា លុះនៅយប់ថ្ងៃទី២០ ខែឆ្នាំដដែល នៅលើកំណត់ផ្លូវកៅស៊ូលេខ១៥៥ ស្ថិតក្នុងភូមិទួលគ្រួស សង្កាត់ចំរើនផល ក្រុងពោធិ៍សាត់ មានករណីគ្រោះថ្នាក់ចរាចរណ៍មួយបានកើតឡើងផងដែរ រវាងអ្នកជិះម៉ូតូបុកគោយន្តកន្រ្ទៃពីក្រោយ បណ្ដាលឲ្យភាគីជិះម៉ូតូរងរបួសធ្ងន់ រីឯម្ចាស់គោយន្តគេចខ្លួន ។
ប្រភពដដែលបន្តទៀតថា ដោយឡែក នៅព្រឹកថ្ងៃទី២១ ខែឆ្នាំដដែលនេះ នៅលើកំណាត់ផ្លូវជាតិលេខ៥ ស្ថិតក្នុងភូមិព្រៃឪម៉ាល់ សង្កាត់រលាប ក្រុង-ខេត្តពោធិ៍សាត់ ក៏មានករណីគ្រោះថ្នាក់ចរាចរណ៍មួយបានកើតឡើងម្ដងទៀត រវាងអ្នកបើកបររថយន្តបុកសត្វពាហនៈ(គោ)ឆ្លងផ្លូវ បណ្ដាលឲ្យសត្វពាហនៈ(គោ)ងាប់កណ្ដាលផ្លូវ ។ ចំណែករថយន្តរងការខូចខាតយ៉ាងដំណំ ករណីគ្រោះថ្នាក់ចរាចរណ៍ខាងលើ សមត្ថកិច្ចនគរបាលជំនាញចរាចរណ៍ផ្លូវគោក កំពុងមមាញឹកបន្តនីតិវិធី ៕ ដោយ÷បុឹម ពិន
