សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ គ្រោះថ្នាក់ចរាចរណ៍បង្កឡើងដោយរថយន្ដជ្រុលទៅបុកម៉ូតូ បណ្ដាលឱ្យបុរសម្នាក់ស្លាប់បាត់បង់ជីវិតភ្លាមៗនៅនឹងកន្លែងកើតហេតុ ហើយខូចខាតម៉ូតូ០១គ្រឿង និងរថយន្ត ០១គ្រឿង។ ហេតុការណ៍នេះបានកើតឡើងកាលពីវេលាម៉ោង១៧ និង ៤៥នាទីថ្ងៃព្រហស្បតិ៍ ១៥រោច ខែពិសាខ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី២១ ខែឧសភា ឆ្នាំ២០២០ នៅលើកំណាត់ផ្លូវជាតិលេខ៦ ចំណុចមុខវត្តសែនសិរី ក្នុងភូមិកំពង់សំរោង សង្កាត់ស្រយូវ ក្រុងស្ទឹងសែន ខេត្តកំពង់ធំ។
សមត្ថកិច្ចបានឱ្យដឹងថា អ្នកបើកបរម៉ូតូឈ្មោះ រ៉ុម សំបូរ ភេទប្រុស អាយុ ២៨ឆ្នាំ មុខរបរ លក់ចានឆ្នាំង រស់នៅភូមិបល្ល័ង្កខាងលិច សង្កាត់ ដំរីជាន់ខ្លា ក្រុងស្ទឹងសែន ខេត្តកំពង់ធំ (ស្លាប់នៅកន្លែងកើតហេតុ ) មិនពាក់មួកសុវត្ថិភាព)បានបើកបរម៉ូតូម៉ាកហុងដាឌ្រីមC125 ពណ៌ខ្មៅ ពាក់ស្លាកលេខកំពង់ធំ1AZ -0007(បើកបរបញ្ច្រាសទិសពីត្បូងទៅជើង ) ។
ចំណែករថយន្តម៉ាក ហាយឡេនឌ័រ ពណ៌ទឹកមាស ពាក់ស្លាកលេខភ្នំពេញ2AZ-9019 (បើកបរពីជើងទៅត្បូង) ដោយឈ្មោះសែម សម្បត្តិ ភេទប្រុស អាយុ ៣២ឆ្នាំ មុខរបរ មន្រ្តីរាជការ រស់នៅភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្ត កណ្តាល (រត់គេចខ្លួនបាត់)។
ក្រោយកើតហេតុសមត្ថកិច្ចបានចុះមកវាស់វែងនៅទីកន្លែងកើតហេតុ ធ្វើកំណត់ហេតុប្រមូលវត្ថុតាងរថយន្ត និងម៉ូតូយកទៅរក្សាទុកនៅស្នងការដ្ឋាននគរបាលខេត្តដើម្បីចងក្រងសំណុំរឿងតាមនីតិវិធី រីឯសពបានប្រគល់ជូនក្រុមគ្រួសារ៕ដោយ៖ប៊ុនរិទ្ធី
