សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ កាលពីល្ងាចថ្ងៃទី ២១ ខែ ឧសភា ឆ្នាំ២០២០ វេលាម៉ោង១៧និង៣០នាទី ប្រជាពលរដ្ឋម្នាក់ ឈ្មោះពុធ វ៉ាន់ ភេទប្រុស អាយុ៥៣ឆ្នាំ រស់នៅភូមិអូរនាង ឃុំតាតោក ស្រុកសំឡូត ខេត្តបាត់ដំបង បានជួបគ្រោះថ្នាក់ដោយការផ្ទុះគ្រាប់មីនប្រភេទ៦៩បណ្ដាលឲ្យផ្ទុះរងរបួសធ្ងន់ នៅត្រង់ចំណុចអូរត្រជាក់ចិត្ត ស្ថិតក្នុងភូមិពាមតា ឃុំតាតោក ស្រុកសំឡូត ខេត្តបាត់ដំបង ដែលទីនោះមានចម្ងាយប្រមាណ៥គីឡូម៉ែត្រពីប៉ុស្តិ៍ព្រំដែនពាមតាផ្លូវបំបែកនៃវរសេនាតូចនគរបាលការពារព្រំដែនគោកលេខ៣១០ស្រុកសំឡូតក្នុង ខណ:ដែលប្រជាពលរដ្ឋរូបនេះគាត់ធ្វេីដំណេីរទៅប្រកបរបរចិញ្ចឹមជីវិតនៅក្នុងព្រៃចំណុចខាងលេី។ ក្នុងពេលជួបឧប្បត្តិហេតុនេះបានបណ្តាលឱ្យជេីងខាងស្តាំរបស់គាត់ទទួលរងរបួសយ៉ាងធ្ងន់ធ្ងរ(ដាច់ជេីងខាងស្តាំ) ។ ដោយសារស្ថានភាពភូមិសាស្រ្តឆ្ងាយនិងផ្លូវពិបាកធ្វេីដំណេីរចាប់តាំងពីពេលកេីតហេតុ រហូតដល់ម៉ោង៦និង២០នាទីព្រឹកថ្ងៃទី ២២ ខែឧសភា ឆ្នាំ២០២០ទេីបសមត្ថកិច្ចនគរបាលនៅមូលដ្ឋានរួមជាមួយប្រជាពលរដ្ឋនាំគ្នាយករូបគាត់មកដល់ទីតាំងដែលមានមធ្យោបាយដឹកនាំគាត់ទៅកាន់មន្ទីរពេទ្យនៅមូលដ្ឋាននោះ។
សូមជម្រាបជូនថា ក្នុងមូលដ្ឋានស្រុកសំឡូត ក៏ដូចជាមូលដ្ឋានស្រុកមួយចំនួនទៀតដែលជាអតីតសមរភូមិប្រយុទ្ធពីអតីតកាលនៅតែមានយុទ្ធភណ្ឌមិនទាន់ផ្ទុះស្ថិតនៅរាយប៉ាយក្នុងដីនៅឡេីយ ហេីយបញ្ហានេះនៅតែជាក្តីកង្វល់និងបញ្ហាប្រឈមសម្រាប់ប្រជាពលរដ្ឋដែលមានមុខរបរ ចេញ ចូលនៅចំណុចឬទីតាំងទាំងនោះ៕ស សារ៉េត
