សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ គួរឲ្យរន្ធត់និងភ័យខ្លាចបំផុតដែលស្រ្តីរងគ្រោះម្នាក់កាន់ឌុយទៅដោតនឹងព្រីភ្លើងស្រាប់តែឆ្លងចរន្តឆក់បណ្តាលឱ្យរងរបួសធ្ងន់ធ្ងរ ត្រូវបានគ្រួសារនាំយកទៅសង្គ្រោះ ប៉ុន្តែបានផុតដង្ហើមពេលមកដល់មន្ទីរពេទ្យ ។
ហេតុការណ៍នេះបានកើតឡើកាលពីវេលាម៉ោង១៨ និង៣០នាទី ថ្ងៃទី០១ ខែ មិថុនា ឆ្នាំ២០២០ នៅចំណុចអណ្តូងទឹកក្រោយផ្ទះជនរងគ្រោះ ស្ថិតនៅក្នុងភូមិទួលវិហារ ឃុំគរ ស្រុកត្បូងឃ្មុំ ខេត្តត្បូងឃ្មុំ។
មន្ត្រីនគរបាលស្រុកត្បូងឃ្មុំឱ្យដឹងថា ជនរងគ្រោះឈ្មោះ ស៊្រាង ធឿន អាយុ ៤៦ឆ្នាំ រស់នៅភូមិឃុំកើតហេតុខាងលេី ។
មន្ត្រីនគរបាលបន្តថា មុនកើតហេតុស្ត្រី រងគ្រោះបានអូសខ្សែភ្លើងចេញពីផ្ទះទៅដោតភ្ជាប់នឹងព្រីម៉ូទ័រជាប់នឹងមាត់អណ្ដូងដើម្បីបូមទឹកដាក់ពាង ខណ:កំពុងតែដោតឌុយចូលព្រីភ្លើងម៉ូទ័រនោះក៏ត្រូវចរន្តអគ្គិសនីឆក់ដៃជនរងគ្រោះជាប់នឹងព្រីដួលដេកនៅទីនោះ ។ ឃេីញដូច្នេះអ្នកជិតខាងនិងក្រុមគ្រួសារប្រញាប់ប្រញាល់ដឹកជនរងគ្រោះយកទៅសង្គ្រោះនៅមន្ទីរពេទ្យបង្អែកស្រុកត្បូងឃ្មុំ តែអកុសលជនរងគ្រោះបានស្លាប់បាត់បង់ជីវិតទៅហើយ។
ករណីនេះកម្លាំងជំនាញនៃអធិការដ្ឋាននគរបាលស្រុកត្បូងឃ្មុំសហការជាមួយកម្លាំងប៉ុស្តិ៍នគរបាលរដ្ឋបាលគរនិងអាជ្ញាធរមូលដ្ឋានចុះដល់កន្លែងកើតហេតុពិនិត្យឃើញថា ស្ត្រីរងគ្រោះពិតជាស្លាប់ដោយសារចរន្តអគ្គិសនីឆក់ប្រាកដមែន ពុំមានពាក់ព័ន្ធនិឹងបទល្មើសព្រហ្មទណ្ឌឡើយ រួចប្រគល់សពជូនក្រុមគ្រួសារធ្វើបុណ្យតាមប្រពៃណី ៕ដោយ ៖ វណ្ណៈ
