សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់សង្ស័យផឹកទឹកប្តូរនិស្ស័យច្រើនហើយទើបបេីករថយន្តឡិចស៊ីសក្នុងល្បឿនលឿនមិនប្រយ័ត្នក៏ជ្រុលទៅបុករថយន្តព្រូសពីក្រោយពេញទំហឹងខណៈដែលរថយន្តនេះកំពុងចតស្ងៀមនៅប្របចិញ្ចេីមផ្លូវហេីយរុញទៅទម្លុះរបងការដ្ឋានមួយកន្លែងរងការខូចខាតយ៉ាងដំណំ។
ហេតុការណ៍នេះបានកេីតឡេីងកាលពីវេលាម៉ោង១និង២០នាទីរំលងអធ្រាត្រ ឈានចូលថ្ងៃទី៣ ខែមិថុនា ឆ្នាំ២០២០ នៅចំណុចខាងលិចវត្តឧណ្ណាលោម តាមបណ្តោយផ្លូវលេខ១១៣ ស្ថិតក្នុងសង្កាត់ជ័យជម្នះ ខណ្ឌដូនពេញ រាជធានីភ្នំពេញ។
តាមប្រភពព័ត៌មានបានឱ្យដឹងថា មុនពេលកេីតហេតុគេបានឃេីញរថយន្តមួយគ្រឿងម៉ាកព្រូស ពណ៌ទឹកប៊ិក ពាក់ស្លាកលេខភ្នំពេញ2BD-2769 ចតនៅប្របចិញ្ចេីមផ្លូវលេខ១១៣ដោយបែរក្បាលទៅទិសខាងត្បូង។ លុះមកដល់វេលាកេីតហេតុស្រាប់តែមានរថយន្តឡិចស៊ីស RX 330 ពណ៌ទឹកប្រាក់ ពាក់ស្លាកលេខភ្នំពេញ2AY-1938 បើកតាមបណ្តោយផ្លូវលេខ១១៣ ក្នុងទិសដៅពីជេីងទៅត្បូងក្នុងល្បឿនលឿនមិនប្រយ័ត្នក៏ជ្រុលទៅបុករថយន្តព្រូសពីក្រោយពេញទំហឹងហេីយរុញទៅបុកទម្លុះជញ្ជាំងរបងការដ្ឋានដែលនៅជាទីនោះរងការខូចខាតយ៉ាងដំណំ។
ក្រោយកេីតហេតុសមត្ថកិច្ចបានចុះទៅដល់ធ្វេីការវាស់វែងយករថយន្តទាំង២គ្រឿងទៅការិយាល័យចរាចរណ៍ជេីងគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយតាមច្បាប់៕ដោយ សុខាសែនជ័យ
