សារព័ត៌មាន នគរវត្ត តែងតែនាំមុខគេជានិច្ច
លោកអ្នកចូលចិត្តផឹកកាហ្វេ តែមិនបានដឹងថាកាហ្វេវាមានភាពវិជ្ជមានឬអវិជ្ជមានអ្វីខ្លះជាមួយសុខភាព?
ការពិតជាតិកាហ្វេអ៊ីន គឺអាចជួយដាស់ស្មារតីរបស់យើង ប៉ុន្តែនៅពេលផឹកវាច្រើនពេកទៅអាចផ្ដល់ផលប៉ះពាល់មួយចំនួនដូចជាពិបាកក្នុងការគេង ចង្វាក់បេះដូងកើនឡើង និងធ្វើឲ្យមានអាការៈញ័រទ្រូងជាដើម។ គេអាចមានចម្ងល់ថាតើគួរធ្វើយ៉ាងដូចម្តេចដើម្បីកម្ចាត់ជាតិកាហ្វេអ៊ីនពីរាងកាយបាន?
កាហ្វេអ៊ីនអាចនឹងកើតមានផលប៉ះពាល់ច្រើនម៉ោង ប្រសិនជាយើងផឹកកាហ្វេ សូដា ភេសជ្ជៈប៉ូវកម្លាំង និងភេសជ្ជៈមានជាតិកាហ្វេអ៊ីនផ្សេងទៀតក្នុងបរិមាណច្រើន។ ចូរចាំថានៅពេលជាតិកាហ្វេអ៊ីនចូលទៅក្នុងរាងកាយយើង មិនមានវិធីអ្វីឲ្យយើងកម្ចាត់ជាតិកាហ្វេអ៊ីនពីរាងកាយទេមានតែចាំឲ្យជាតិកាហ្វេអ៊ីនសាបទៅដោយខ្លួនឯងប៉ុណ្ណោះ។ ដើម្បីកាត់បន្ថយផលប៉ះពាល់បានខ្លះក្នុងពេលយើងហូបកាហ្វេអ៊ីនគួរអនុវត្តដូចខាងក្រោម÷
១. បញ្ឈប់ការផឹកភេសជ្ជៈមានជាតិកាហ្វេអ៊ីននៅពេលយើងឃើញមានរោគសញ្ញាមួយចំនួនដូចជាអាការ:ញ័រដៃ ជើងយើងគួរបញ្ឈប់ការផឹកភេសជ្ជៈ មានជាតិកាហ្វេអ៊ីនដែលមានដូចជាតែ ភេសជ្ជៈប៉ូវកម្លាំង សូដា និងសូកូឡាខ្មៅ។ គួរយកចិត្តទុកដាក់ទៅលើឱសថ និងអាហារបំប៉នដែលអាចមានជាតិកាហ្វេអ៊ីន។ ឧទាហរណ៍ថ្នាំ Aspirin មានផ្ទុកកាហ្វេអ៊ីន ៤០ទៅ៦០មីល្លិក្រាមក្នុងមួយគ្រាប់។
២. រង់រង់ចាំឲ្យកាហ្វេអ៊ីនអស់ប្រសិទ្ធភាពសិន។
ក្នុងរយៈពេល៤៥នាទីក្រោយពីផឹក ឬញ៉ាំអាហារ ឬភេសជ្ជៈមានជាតិកាហ្វេអ៊ីន អាចនៅក្នុងរាងកាយបានរហូតដល់៣ ទៅ៥ម៉ោង។ លើសពីនេះទៀត រាងកាយអាចនឹងត្រូវការរយៈពេល១០ម៉ោងដើម្បីសម្អាតកាហ្វេអ៊ីនអស់ទាំងស្រុង។ ប្រសិនជាគ្នាយើងមានបញ្ហាក្នុងការគេង យកល្អគួរបញ្ឈប់ការញ៉ាំជាតិកាហ្វេអ៊ីន ៦ទៅ៨ម៉ោងមុនម៉ោងចូលគេង។
៣. ផឹកទឹក។
ការផឹកទឹកគឺសំខាន់ក្នុងការរក្សាជាតិទឹក។ ការសិក្សាមួយចំនួនបានអះអាងថាការផឹកទឹកអាចជួយបន្ថយអាការៈញ័របង្កដោយជាតិកាហ្វេអ៊ីន។ ដូចនេះហើយពេលកំពុងរង់ចាំឲ្យជាតិកាហ្វេអ៊ីនសាបពីរាងកាយ យកល្អគួរផឹកទឹកឲ្យបានច្រើន ឬនោម ឲ្យញឹកបន្តិច។
៤. ហាត់ប្រាណ
ការហាត់ប្រាណអាចជួយឲ្យរាងកាយធ្វើមេតាបូលីសជាតិកាហ្វេអ៊ីនលឿនជាងមុន។ យើងអាចដើរហាត់ប្រាណ ឬធ្វើលំហាត់ប្រាណផ្សេងទៀតដែលអាចឲ្យរាងកាយធ្វើចលនាបាន។
៥. ញ៉ាំពពួកផ្កាខាត់ណា
ផ្កាខាត់ណា និងផ្កាខាត់ណាខៀវជាជម្រើសល្អក្នុងការពង្រឹងការធ្វើមេតាបូលីស និងកំចាត់ជាតិកាហ្វេអ៊ីន។
៦. គេងឲ្យបាន២០នាទី
ការគេងរយៈពេលខ្លីក្រោយពីផឹក ឬញ៉ាំជាតិកាហ្វេអ៊ីនអាចជួយរាងកាយក្នុងការទប់ទល់នឹងផលប៉ះពាល់។ ការគេងត្រឹមតែ២០នាទីនេះ ពេលក្រោកឡើងយើងនឹងមានអារម្មណ៍ស្រស់ស្រាយជាងមុន។
៧. ហានិភ័យនៃការផឹកជាតិកាហ្វេអ៊ីនច្រើនលើសកំណត់
ទោះបីជាជាតិកាហ្វេអ៊ីនត្រូវគេទទួលស្គាល់ថាមានសុវត្ថិភាព ប៉ុន្តែមនុស្សម្នាក់ៗធន់នឹងជាតិកាហ្វេអ៊ីនខុសៗគ្នាក៏ដោយ។ យើងគួរយកចិត្តទុកដាក់ទៅលើផលប៉ះពាល់ផ្សេងៗរួមមានឈឺក្បាល ញ័រដៃជើង ពិបាកក្នុងការគេង និងចង្វាក់បេះដូងញាប់។ នៅពេលមានអាការៈបែបនេះ គួរកាត់បន្ថយការផឹកជាតិកាហ្វេអ៊ីន។
ប៉ុន្តែបើផឹកហើយមានរោគសញ្ញាដូចជាចុកទ្រូង គ្រុនក្ដៅ ចង្វាក់បេះដូងមិនប្រក្រតី បាត់បង់ជាតិទឹក ពិបាកដកដង្ហើម និងមិនអាចគ្រប់គ្រងចលនាសាច់ដុំបាន យើងត្រូវទៅពិគ្រោះជាមួយគ្រូពេទ្យជាបន្ទាន់៕
