ព័ត៌មានទាន់ហេតុការណ៍៖

តើក្មេងៗមានកំហុសអី បានបំផ្ទុះគ្រាប់បែក​ក្នុងសាលារៀន សម្លាប់សិស្សជាច្រើននៅអាហ្វហ្គានីស្ថាន

ចែករំលែក៖

អាហ្វហ្គានីស្ថាន៖ ទង្វើរបស់មនុស្សធំ ធ្វើឲ្យកុមារក្លាយជាជនរងគ្រោះដោយអយុត្តិធម៌ ក្នុងសង្គ្រាម​ អំពើហិង្សាជាតិសាសន៍​។
សារព័ត៌មាន​​AFP ​នៅថ្ងៃទី​១៨ ខែមិថុនា បានផ្សាយថា មានករណីបំផ្ទុះគ្រាប់បែកនៅក្នុងសាលារៀន សាសនាមួយនៅភាគខាងជើង អាហ្វហ្គានីស្ថាន បណ្តាលឲ្យសិស្ស៩នាក់ស្លាប់និងរបួសជាច្រើន។
អ្នកនាំពាក្យកម្លាំងប៉ូលិស ក្នុងតំបន់បានឲ្យដឹងថា​តាមលទ្ធផលស្រាវជ្រាវជាបឋមការផ្ទុះ បង្កឡើងដោយគ្រាប់កាំភ្លើងត្បាល់​។​ នៅពេលនេះគេមិនទាន់ដឹងថា គ្រាប់កាំភ្លើងត្បាល់នេះ​នាំចូលសាលារៀនដោយរបៀបណា។
ក្នុងចំណោមជនរងគ្រោះគឺជាសិស្ស មានអាយុ ក្រោម១៨ឆ្នាំទាំងអស់ និងមានសិស្ស​៦នាក់ផ្សេងទៀតរងរបួស។ ហេតុការខាងលើកើតឡើងនៅក្នុងសាលា រៀនមួយក្នុងស្រុក Ishkamish ស្ថិតនៅក្នុងខេត្តTakhar។
ហេតុការផ្ទុះគ្រាប់បែកខាងលើកើតឡើង ក្រោយពេលមាន ករណីផ្ទុះពីរលើកផ្សេងទៀតនៅព្រះវិហារក្នុងទីក្រុងកាប៊ុល​ ក្នុងខែមិថុនានេះ។ តាមសារព័ត៌មាន​​ AFP ​អំពើហិង្សាបានកើតឡើងជាបន្តបន្ទាប់នៅក្នុងប្រទេសអាហ្វហ្គានីស្ថាន ក្នុងពេលរដ្ឋាភិបាល និងក្រុមតាលីបង់ ត្រៀមតភ្ជាប់កិច្ចពិភាក្សា​បញ្ចប់អំពើហិង្សាដែលអូសបន្លាយរយៈពេល​ជិត​២ទសវត្សរ៍កន្លងមក។
អ្នកនាំពាក្យ​ក្រសួងមហាផ្ទៃអាហ្វហ្គានីស្ថាន​ លោក​Tareq Arian បានឲ្យដឹងថា ក្នុងរយៈពេល​១សប្តាហ៍កន្លងមក ក្រុមតាលីបង់បានវាយប្រហារដល់ទៅ​២២២លើក ទៅលើទីតាំងនានារបស់កម្លាំងសន្តិសុខអាហ្វហ្គានីស្ថាន​បណ្តាលឲ្យមានអ្នកស្លាប់​៤២២នាក់​៕ដោយ៖ធី រីណា


ចែករំលែក៖