ចោរប្លន់ក៏មានចិត្តល្អដែរ! ឃើញជនរងគ្រោះយំសស្រាក់ ក៏ឱ្យប្រាក់វិញ ហើយចាប់ដៃលើកទឹកចិត្តទៀតផង

ប្រទេសប៉ាគីស្ថាន៖ នៅក្នុងសង្គមនេះគឺមានរឿងរ៉ាវប្លែកៗជាច្រើន នឹកស្មានមិនដល់ ដោយអ្នកអាក្រក់មិនប្រាកដថាអាក្រក់ទាំងអស់នោះទេ ក៏មានចំណុចល្អ ដែលធ្វើឲ្យមនុស្សជាច្រើនស្រក់ទឹកភ្នែកនោះដែរ ។
ពេលថ្មីៗនេះឃ្លីបវីដេអូ មួយដែលបង្ហោះរូបភាពចោរប្លន់ពីរនាក់ ប្លន់អ្នកអ្នកជញ្ជូន(shipper) នៅទីក្រុង ការ៉ាជី ប្រទេសប៉ាគីស្ថាន ។ ឃ្លីបវីដេអូបង្ហាញឲ្យឃើញថា ក្រោយពេលជូនទំនិញដល់អតិថិជនរួច អ្នកដឹកជញ្ជូនក៏បានវិលត្រឡប់មកកាន់ម៉ូតូរបស់ខ្លួនដែលចតតាមដងផ្លូវវិញ។
នៅពេលនោះចោរ២នាក់បានជិះម៉ូតូមកដល់ អ្នកអង្គុយក្រោយចុះហើយយកកាំបិតភ្ជង់ គំរាមឲ្យប្រគល់វត្ថុមានតម្លៃទាំងអស់ ពិសេសគឺប្រាក់។ ប៉ុន្តែជនរងគ្រោះមិនមានប្រតិកម្មអ្វីខ្លាំងនោះឡើយ មានតែយំប៉ុណ្ណោះ ដោយលុយទើបតែផ្តល់ទំនិញត្រូវ ចោរប្លន់ទៅអស់ តើមានលុយឯណាសងគេ។
ក្រោយឃើញអ្នកដឹកជញ្ជូនមិនតបត មានតែយំ ធ្វើឲ្យចោរទាំងពីរនាក់ផ្លាស់ប្តូរចិត្ត ក៏សងលុយទាំងអស់ទៅជនរងគ្រោះវិញ ថែមទាំងចាប់ដៃនិងលើកទឹកចិត្ត ដល់អ្នកដឹកជញ្ជូនទៀតផង មុនពេលបើកម៉ូតូចេញទៅ។
ទិដ្ឋភាពពីការប្លន់ខាងលើបានបង្ហោះលើបណ្តាញសង្គម ទទួលបានការចាប់អារម្មណ៍ជាច្រើន ដោយមានអ្នកចូលផ្តល់មតិរាប់ម៉ឺននាក់។ អ្នកខ្លះក៏បានសរសេរថា«ចិត្តល្អរបស់ចោរធ្វើឲ្យខ្ញុំស្រក់ទឹកភ្នែក។ យើងទាំងអស់គ្នាស្អប់ចោរប្លន់ ប៉ុន្តែសកម្មភាពខាងលើ ធ្វើឲ្យយើងវាយតម្លៃផ្សេងមួយទៀត។ ចោរក៏មានប្រភេទនេះប្រភេទនោះដែរ មិនមែនអាក្រក់ទាំងអស់នោះឡើយ។ ពេលឃើញជនរងគ្រោះក៏ជាអ្នកក្រ ចោរក៏មិនដាច់ចិត្តយកទ្រព្យទៅដែរ៕ដោយ៖ធី រីណា