សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ ក្មេងស្ទាវឈាមរាវពីរនាក់ ដែលមានចរិតបំផ្លិចបំផ្លាញទ្រព្យសម្បត្តិ សាធារណៈ ពិសេសយកដុំវត្ថុរឹងគប់ទៅ លេីកញ្ចក់រថយន្តអ្នកដំណេីរ និងប្រេីខ្សែក្រវាត់វាយលេីសមត្ថកិច្ចពេលចុះបំពេញ ភារកិច្ចការពារសុវត្ថិភាពប្រជាពលរដ្ឋ ត្រូវបានចាប់ឃាត់ខ្លួនបញ្ជូនមកអធិការដ្ឋាននគរបាលស្រុកត្បូងឃ្មុំដើម្បីចងក្រងសំណុំរឿងតាមនីតិវិធី។ជនទាំងពីរនាក់នេះ ត្រូវបានសមត្ថកិច្ចចាប់ឃាត់ខ្លួននៅចំណុចតាមផ្លូវខាងលិចរង្វង់មូលស្រឡប់ ស្ថិតក្នុងភូមិស្រឡប់ ឃុំស្រឡប់ នៅវេលាម៉ោង២១៖០០នាទីយប់ ថ្ងៃទី១៩ ខែមិថុនា ឆ្នាំ២០២០ក្រោយពីធ្វេីសកម្មភាពវាយបំផ្លាញទ្រព្យសម្បត្តិសាធារណៈនៅចំណុចតាមផ្លូវភ្លោះ ស្ថិតក្នុងភូមិត្រពាំងដុំ ឃុំស្រឡប់ ស្រុកត្បូងឃ្មុំកាលពីវេលាម៉ោង១៩និង៣០នាទី ហេីយរត់គេចខ្លួន ។សមត្ថកិច្ចឱ្យដឹងថា ការចាប់ឃាត់ខ្លួនក្មេងទំនើងតាមការបញ្ជាដឹកនាំពីលោកឧត្ដមសេនីយ៍ទោ បែន រ័ត្ន ស្នងការនគរបាលខេត្តនេះ កម្លាំងជំនាញនគរបាលស្រុកត្បូងឃ្មុំ សហការជាមួយកម្លាំងប៉ុស្តិ៍នគរបាលរដ្ឋបាលស្រឡប់ចុះទៅស្រាវជ្រាវនិងបង្ក្រាបក្មេងទំនើងគប់កញ្ចក់រថយន្តគេនៅចំណុចតាមផ្លូវភ្លោះស្ថិតក្នុងភូមិត្រពាំងដុំ ឃុំស្រឡប់ ស្រុកត្បូងឃ្មុំកាលពីវេលាម៉ោង១៩៖៣០នាទី។ ភ្លាមៗនោះកម្លាំងជំនាញ និងកម្លាំងប៉ុស្តិ៍ក៏បានចុះទៅដល់កន្លែងកើតហេតុធ្វើការស្រាវជ្រាវ និងល្បាតតាមរកមុខសញ្ញាល្មើស ។ លុះមកដល់ចំណុចតាមផ្លូវខាងលិចរង្វង់មូលស្រឡប់ ស្ថិតក្នុងភូមិ ស្រឡប់ ឃុំស្រឡប់ នៅវេលាម៉ោង២១៖០០នាទី ស្រាប់តែជួបនឹងក្មេងទំនើងចំនួន២នាក់ កំពុងឈរកាន់ខ្សែក្រវាត់ឈរស្ទាក់ផ្លូវប៉ុនប៉ងវាយលើសមត្ថកិច្ចយើង តែភ្លាមនោះកម្លាំងសមត្ថកិច្ចក៏ធ្វើការឃាត់ខ្លួនក្មេងទំនើងទាំងនោះបានតែម្តង។ក្មេងទំនើងទាំងពីរនាក់ដែលសមត្ថកិច្ចចាប់ឃាត់ខ្លួនមាន១.ឈ្មោះ ណាន និត ភេទប្រុស អាយុ២១ឆ្នាំ ជនជាតិខ្មែររស់នៅភូមិល្ងើន ឃុំក្តឿងរាយ ស្រុកកញ្ច្រៀច ខេត្តព្រៃវែង និង២.ឈ្មោះ បូ ចាន់តូ ភេទប្រុស អាយុ១៨ឆ្នាំ ជនជាតិខ្មែរ រស់នៅភូមិព្នៅក្រៅ ឃុំព្រៃចារ ស្រុកជើងព្រៃ ខេត្តកំពង់ចាម ទាំងពីរនាក់នេះស្នាក់នៅធ្វើការជាជាងទឹកភ្លើងនៅផ្ទះល្វែងក្បែរកន្លែងកើតហេតុនោះ។សមត្ថកិច្ចដកហូតបានខ្សែក្រវាត់ចំនួន ២ និងម៉ូតូ១គ្រឿងម៉ាកZOOMER-X ហើយ ជនសង្ស័យទាំងពីរនាក់ខាងលើត្រូវបានបញ្ជូនមកអធិការដ្ឋាននគរបាលស្រុកត្បូងឃ្មុំដើម្បីចងក្រងសំណុំរឿងតាមនីតិវិធី ៕ ដោយ ៖ វណ្ណៈ
