ក្រសួងបរិស្ថានបង្កើតក្រុមការងារជួយសហគមន៍តំបន់ការពារធម្មជាតិ ដើម្បីលើកម្ពស់ជីវភាពសហគមន៍កាន់តែប្រសើរ

ភ្នំពេញ៖ នាព្រឹកថ្ងៃពុធ ៥កើត ខែអាសាឍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៤ ខែមិថុនា ឆ្នាំ២០២០ លោកស្រី ម៉ុម ថានី រដ្ឋលេខាធិការក្រសួងបរិស្ថាន បានដឹកនាំកិច្ចប្រជុំក្រុមការងារជួយសហគមន៍តំបន់ការពារធម្មជាតិដែលទើបបង្កើតឡើងដោយក្រសួងបរិស្ថាន ដើម្បីជួយអភិវឌ្ឍន៍ជីវភាពប្រជាពលរដ្ឋតាមមូលដ្ឋាននៃតំបន់ការពារធម្មជាតិ។

លោកស្រី បានលើកឡើងថា ក្រុមការងារនេះ មានតួនាទីភារកិច្ចសំខាន់ធ្វើការសិក្សា និងលើកសំណើជូនលោករដ្ឋមន្រ្តីក្រសួងបរិស្ថាន នូវយុទ្ធសាស្រ្ត ផែនការ គម្រោង និងគំរូអនុវត្ត ដើម្បីធ្វើឱ្យប្រសើរឡើងនូវជីវភាពសហគមន៍តំបន់ការពារធម្មជាតិ ដោយបន្សីទៅនឹងក្របខណ្ឌស្ថាប័ន គោលនយោបាយ និងបទដ្ឋានគតិយុត្តរបស់ក្រសួបរិស្ថាន ព្រមទាំងធានាបាននូវខ្សែច្រវាក់តម្លៃ និងនិរន្តរភាព។ ជាមួយគ្នានេះក្រុមការងារសម្របសម្រួលការងារ ដើម្បីបង្កើតឱកាសកាន់តែល្អប្រសើរសម្រាប់ការប្រកបរបរចិញ្ចឹមជីវិត របស់ប្រជាសហគមន៍នៅតាមតំបន់ការពារធម្មជាតិ ព្រមទាំងលើកកម្ពស់សមត្ថភាពសហគមន៍ តាមរយៈការបណ្តុះបណ្តាលជំនាញវិជ្ជាជីវៈ ការផ្សព្វផ្សាយបច្ចេកទេស និងការគាំទ្រជាសម្ភារៈ និងធនធានចាំបាច់ ជាពិសេសលើការដាំដុះ និងចិញ្ចឹមសត្វ ព្រមទាមងការងារផ្សេងទៀត លើកកម្ពស់ជីវភាពសហគមន៍នៅតាមតំបន់ការពារធម្មជាតិ។

ជាមួយគ្នានេះ លោកស្រី ម៉ុម ថានី បានលើកទឹកចិត្តឱ្យក្រុមការងារថ្មីនេះ យកចិត្តទុកដាក់លើការសិក្សាស្រាវជ្រាវដើម្បីបង្កើតជាយុទ្ធសាស្រ្តគ្រប់ជ្រុងជ្រោយរយៈពេលវែង និង ខ្លី ដោយសហការជាមួយដៃគូ និងអ្នកពាក់ព័ន្ធ ដើម្បីចូលរួមជំរុញការអភិវឌ្ឍជីវភាពសហគមន៍មូលដ្ឋានប្រកបដោយនិរន្តរភាព។

សូមបញ្ជាក់ថា នៅក្នុងកិច្ចប្រជុំនេះ ក្រុមអ្នកជំនាញនៅមកពីមជ្ឈមណ្ឌលយុទ្ធសាស្រ្ត និងគោលនយោបាយនវានុវត្តន៍ ហៅថា CSIP បានចូលរួមធ្វើបទបង្ហាញពីគម្រោងសិក្សាស្រាវជ្រាវវិទ្យាសាស្រ្ត លើគំរូអភិវឌ្ឍន៍សហគមន៍ប្រកបដោយចីរភាព (Sustainable Community Development Model)សំដៅគាំទ្រដល់កម្មវិធីការងារគោលនយោបាយ និងដំណើរការគម្រោងជួយជីវភាពសហគមន៍ បន្ថែមលើកយន្តការដែលក្រសួងបរិស្ថានកំពុងប្រតិបត្តិ និងផែនការសកម្មភាពនានា ដើម្បីការអភិវឌ្ឍដោយចីរភាពនៅកម្ពុជា៕

ដោយ៖សហការី