សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ ផ្ទះចំនួន២ខ្នងធ្វើអំពីឈើប្រក់ក្បឿងទំហំ៥,៥០ម៉ែត្រគុណនឹង៨ម៉ែត្រ និងទ្រព្យសម្បត្តិជាច្រេីនត្រូវភ្លើងឆេះខូចខាតអស់ តែពុំមានរងរបួសដល់ម្ចាស់ផ្ទះឡើយ។ករណីនេះបណ្តាលមកពីផ្ទុះធុងហ្គាស កាលពីថ្ងៃទី៨ ខែកក្កដា ឆ្នាំ២០២០ វេលាម៉ោង៨៖៣០នាទី នៅចំណុចភូមិអូរបេង ឃុំមេសរជ្រៃ ស្រុកស្ទឹងត្រង់ ។
ផ្ទះដែលត្រូវភ្លើងឆេះខូចខាតខាងលេីមានម្ចាស់ឈ្មោះ រូន សូកូត ភេទប្រុស អាយុ៤៥ឆ្នាំ ជាតិខ្មែរអ៊ិស្លាម ប្រពន្ធឈ្មោះ សាអុីត រូហានី អាយុ២៦ឆ្នាំ ។ ផ្ទះមានចំនួន២ខ្នងធ្វើអំពីឈើប្រក់ក្បឿង ទំហំ៥,៥០ម៉ែត្រគុណនឹង៨ម៉ែត្រដែលបណ្តាលមកពីផ្ទុះធុងហ្គាស(ធុងធំ) និងបាត់បង់ទ្រព្យសម្បត្តិរួមមាន៖ ប្រាក់ដុល្លារចំនួន ២០,១៥០ដុល្លារ, ប្រាក់ម៉ាឡេសុីចំនួន២០០, ប្រាក់រៀលចំនួន៣០០,០០០រៀលនិងទ្រព្យសម្បត្តិនៅក្នុងផ្ទះមួយចំនួនទៀត។
តាមប្រភពឱ្យដឹងថា ករណីអគ្គិភ័យនេះ បណ្តាលឱ្យរាលទៅឆេះជញ្ជាំងផ្ទះអ្នកជិតខាងមានឈ្មោះ ញិប ម៉េងឃាង ភេទប្រុស អាយុ៣៩ឆ្នាំ ជនជាតិខ្មែរអស់មួយចំហៀងខាងកើតតែមិនបណ្តាលឱ្យប៉ះពាល់ដល់ទ្រព្យសម្បត្តិអ្វីឡើយ។
ឧប្បត្តិហេតុនេះ សមត្ថកិច្ចខាងពន្លត់អគ្គិភ័យបសនប្រើប្រាស់រថយន្តពន្លត់អគ្គិភ័យចំនួនពីរគ្រឿង គឺរថយន្តអធិការដ្ឋាននគរបាលស្រុកស្ទឹងត្រង់១គ្រឿង និងរថយន្តអធិការដ្ឋាននគរបាលស្រុកចំការលើ១គ្រឿង ប្រើប្រាស់ទឹកអស់៣សុីទែន ៕
ដោយ ៖ វណ្ណះ
