សារព័ត៌មាន នគរវត្ត តែងតែនាំមុខគេជានិច្ច
អង់គ្លេស៖ក្រុមម្ចាស់ជើងឯកលីកកំពូលអង់គ្លេស Premier League យកឈ្នះក្រុមម្ចាស់ផ្ទះ Brighton ក្នុងលទ្ធផល ៣ទល់១ នៅកីឡដ្ឋាន Amex ។ ចំណែកក្រុមមេឃខៀវ Man City បានបំបាក់ក្រុមភ្ញៀវ Newcastle មិនឲ្យតដៃរួចក្នុងលទ្ធផល ៥ទល់០ ក្នុងការប្រកួតកាលពីរាត្រីថ្ងៃទី៨ ម្សិលមុិញ។ នេះបើយោងតាមការចុះផ្សាយរបស់ BBC Sport នៅព្រឹកថ្ងៃព្រហស្បតិ៍នេះ។
ក្រុមហង្សក្រហម Liverpool បានបន្តការឈ្នះដើម្បីបំបែកកំណត់ត្រានៃក្របខ័ណ្ឌ Premier League ជាមួយនឹងជ័យជម្នះដោយព្យាយាមស្វែងរកឲ្យបាន១០០ពិន្ទុ។ ក្រុមហង្សក្រហមបានទទួល៣ពិន្ទុបន្ថែមទៀតជាមួយនឹងភាពងាយស្រួលនៅពេលដែលពួកគេរកបាន២គ្រាប់ក្នុងរយៈពេល៨នាទី ខណៈដែលក្រុម Brighton កំពុងតែព្យាយាមឲ្យក្រុមរបស់ខ្លួនឆ្លងផុតពីតំបន់កាត់ចោល។
ខ្សែប្រយុទ្ធសញ្ជាតិអេហ្ស៊ីប Mohamed Salah រកបាន១គ្រាប់នៅនាទីទី៦ និងគ្រាប់ទី២រកបានដោយប្រធានក្រុម Liverpool កីឡាករ Jordan Henderson នៅនាទីទី៨ដោយស៊ុតបាល់ពីចម្ងាយយ៉ាងល្អ។ ទោះយ៉ាងណាក្រុម Brighton បានវាយបកវិញរកបាន១គ្រាប់នៅនាទីទី៤៥ ដោយកីឡាករ Leandro Trossard ពីការបញ្ជូនបាល់របស់ Tariq Lamptey ។ នៅនាទីទី៧៦ ខ្សែប្រយុទ្ធឆ្នើមរបស់ក្រុមហង្សក្រហម Mohamed Salah ដដែលរកបានគ្រាប់បាល់១គ្រាប់ទៀត ដែលធ្វើឲ្យកីឡាកររូបនេះក្លាយជាកីឡាករល្អបំផុតប្រចាំការប្រកួតនេះ ដោយរកបាន២គ្រាប់ និងបញ្ជូនបាល់ឲ្យមិត្តរួមក្រុមស៊ុតមួយគ្រាប់។
ចប់ការប្រកួតក្រុមភ្ញៀវហង្សក្រហម Liverpool បានយកឈ្នះក្រុមម្ចាស់ផ្ទះ Brighton ក្នុងលទ្ធផល ៣ទល់១ ធ្វើឲ្យក្រុមហង្សក្រហមកើនពិន្ទុឡើង៩២ពិន្ទុ ខណៈដែលក្រុម Brighton បានធ្លាក់មកឈរចំណាត់ថ្នាក់លេខ១៥ មាន៣៦ពិន្ទុ។
ចំណែកក្រុម Manchester City បានវិលត្រឡប់ទៅរកជ័យជម្នះដោយការបំបាក់ក្រុមភ្ញៀវ Newcastle ក្នុងលទ្ធផល ៥ទល់០ នៅឯកីឡដ្ឋាន Etihad ។ ក្រុមរបស់លោក Pep Guardiola បានចាញ់ក្រុមSouthampton នៅក្នុងការប្រកួតក្របខ័ណ្ឌ Premier League កាលពីសប្តាហ៍មុន ប៉ុន្តែសម្រាប់ការប្រកួតនៅរាត្រីម្សិលមុិញពួកគេធ្វើបានល្អដោយយកឈ្នះគូប្រកួតយ៉ាងធំធេង។
៥គ្រាប់របស់ក្រុមម្ចាស់មេឃខៀវ Man City រកបានដោយកីឡាករ Gabriel Jesus នៅនាទីទី១០ គ្រាប់ទី២រកបានដោយកីឡាករ Mahrezនៅនាទីទី២១, គ្រាប់ទី៣គឺជាការភ្លាត់ស្នៀតរបស់កីឡាករ Fernándezរបស់ក្រុម Newcastle ធ្វើឲ្យចូលទីខ្លួនឯងនៅនាទីទី៥៨ គ្រាប់បាល់ទី៤រកបានដោយកីឡាករ David Silva នៅនាទីទី៦៥ និងគ្រាប់បាល់ទី៥រកបានដោយកីឡាករ Sterling នៅនាទីទី៩០ជិតចប់ការប្រកួត។
លទ្ធផលនេះធ្វើឲ្យក្រុម Man City មាន៦៩ពិន្ទុ វ៉ាដាច់៩ពិន្ទុពីក្រុមលេខ៣ ខណៈដែលក្រុម Newcastle ធ្លាក់ដល់លេខ១៣មាន៤៣ពិន្ទុ។
សូមបញ្ជាក់ថា កាលប្រកួតក្របខ័ណ្ឌលីកកំពូលអង់គ្លេសនៅសល់៤ប្រកួតទៀតនឹងចប់រដូវកាល។ ក្រុម Man City ធ្លាប់ធ្វើបាន១០០ពិន្ទុនៅក្របខ័ណ្ឌអង់គ្លេស Premier League មួយនេះ ហើយក្រុមហង្សក្រហមក៏កំពុងព្យាយាមរកពិន្ទុឲ្យបាន១០០ពិន្ទុសម្រាប់រដូវកាលនេះដែរ។ បច្ចុប្បន្ននេះក្រុមហង្សក្រហម Liverpool ឈ្នះ៣០ប្រកួតក្នុងចំណោម៣៤ប្រកួតរបស់ពួកគេនៅរដូវកាលនេះ (ស្មើ២ ចាញ់២)។ ទិន្នន័យនេះគឺជាក្រុមលឿនបំផុតដែលមិនធ្លាប់មានដែលទទួលបានជ័យជម្នះ៣០ដងក្នុងមួយរដូវកាលក្នុងប្រវត្តិសាស្ត្រនៃលីកបាល់ទាត់អង់គ្លេស ៕
ដោយ៖ភារៈ
