សារព័ត៌មាន នគរវត្ត តែងតែនាំមុខគេជានិច្ច
ប្រទេសកុងហ្គោ៖ ការបាញ់ប្រហារសម្លាប់រង្គាលទៅលើពលរដ្ឋស្លូតត្រង់នៅក្នុងខេត្ត អុីទួរី(Ituri) នៃសាធារណរដ្ឋកុងហ្គោ បណ្តាលឲ្យពលរដ្ឋ ២០នាក់ស្លាប់។
បច្ចុប្បន្នស្ថានភាពសន្តិសុខនៅប្រទេសកុងហ្គោមិនមានសុវត្ថិភាពឡើយ។
សារព័ត៌មាន AFP បានផ្សាយថា ការបាញ់ប្រហារសម្លាប់មនុស្សជាច្រើននេះបានកើតឡើងកាលពីថ្ងៃទី៨ ខែកក្កដា ស្ថិតនៅក្នុងស្រុកDjugu ភាគខាងជើង ទីក្រុងBunia ស្ថិតនៅក្នុងខេត្តIturi។ នៅពេលនេះរដ្ឋាភិបាលបានជំរុញការស្រាវជ្រាវឲ្យបានឆាប់បំផុតពីការខូចខាតទ្រព្យសម្បត្តិនិងអាយុជីវិតមនុស្សក្នុងការវាយប្រហារខាងលើ។
មានការសង្ស័យថា ការបាញ់ប្រហារ ដ៏សាហាវនេះបង្កឡើងដោយខ្មាន់កំាភ្លើងក្រុមសម្ព័ន្ធដើម្បីអភិវឌ្ឍកុងហ្គោ(CODECO) ។ ក្រុមនេះមានភាពល្បីល្បាញ និងធ្វើសកម្មភាពជាច្រើននៅក្នុងប្រទេសកុងហ្គោនេះ។
សមាជិកក្រុមនេះ ភាគច្រើនជាជនជាតិLendu ប្រកបរបរកសិកម្ម ហើយតែងតែប៉ះទង្គិចជាមួយក្រុមជនជាតិផ្សេងទៀតដែលចិញ្ចឹមសត្វ ហើយតែងតែទៅប៉ះពាល់ដល់ដំណាំកសិកម្មរបស់ពួកគេ ដែលជាដើមហេតុតែងតែបង្កឲ្យមានការប៉ះទង្គិចគ្នាដោយអំពើហិង្សាកើតឡើង៕ដោយ៖ធី រីណា
