សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តស៊េរីទំនេីបម៉ាកFord មួយគ្រឿង ខណៈកំពុងបេីកឆ្លងផ្លូវ ក៏ត្រូវម៉ូតូម៉ាកហុងដាឌ្រីមមួយគ្រឿងរួមនិងកង់បីមួយគ្រឿងទៀត មកបុកចំពីមុខនិងចំហៀងពេញទំហឹង បណ្ដាលឲ្យរងការខូចខាត បង្កការកកស្ទះចរាចរណ៍ដល់អ្នកដំណេីរកាលពីវេលាម៉ោង៨ និង២០នាទីយប់ ថ្ងៃទី៩ ខែកក្កដា ឆ្នាំ២០២០ ស្ថិតនៅតាមបណ្ដោយផ្លូវព្រះមុន្នីវង្ស កែងផ្លូវ៩៦ ស្ថិតក្នុងសង្កាត់វត្តភ្នំ ខណ្ឌដូនពេញ ។
បេីតាមប្រភពព័ត៌មានពីកន្លែងកេីតហេតុបានឲ្យដឹងថា ដំបូងមានរថយន្តម៉ាក Ford ពណ៌ឈាមជ្រូក ពាក់ស្លាកលេខភ្នំពេញ 2BG-1390 ដែលបេីកបរដោយជនជាតិបរទេស បានឆ្លងពីផ្លូវព្រះមុន្នីវង្ស មកផ្លូវ៩៦ ដោយមានសញ្ញាភ្លេីងខៀវ ។ ខណៈពេលនោះស្រាប់តែមានម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ តាកែវ 1G-1344 ជិះដោយយុវជនម្នាក់ និងមានម៉ូតូកង់បីដឹកឥវ៉ាន់មួយគ្រឿងទៀត បានធ្វេីដំណេីរទន្ទឹមគ្នាបំពានភ្លេីងស្តុប ក៏ជ្រុលទៅបុករថយន្តស៊េរីទំនេីបម៉ាកFord ចំពីមុខនិងចំហៀងពេញទំហឹង បណ្ដាលឲ្យបែកចង្កៀង និងបាក់កាង រងការខូចខាត ។
ក្នុងករណីនេះ មិនបណ្ដាលឲ្យនរណាម្នាក់រងរបួសនោះទេ ហេីយមួយសន្ទុះក្រោយមកក៏មានសមត្ថកិច្ចមូលដ្ឋានចុះមកដល់ រួចធ្វើការវាស់វែងយកវត្ថុតាងមកអែមខាងសិន ដេីម្បីកុំឲ្យមានការកកស្ទះចរាចរណ៍ដល់អ្នកដំណេីរ ។
ក្រោយមក ដោយភាគីរថយន្តម៉ាកFord និងម៉ូតូកង់បី មានក្រុមហ៊ុនធានារ៉ាប់រងដូចគ្នា ទេីបភាគីខាងម៉ូតូកង់បីចេញថ្លៃខូចខាតត្រង់ចំណុចដែលខ្លួនបុក រីឯភាគីខាងម៉ូតូ ដោយសារភាគីរថយន្តយល់ឃេីញថាជាសិស្សសាលា និងមិនសូវមានលុយកាក់ផងនោះ ក៏ព្រមឲ្យត្រឡប់ទៅវិញ ដេីម្បីបញ្ចប់រឿងនៅនឹងកន្លែងតែម្ដង៕ ដោយ៖ ភារ៉ា ដង្កោ
