សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀងះ លោកណុប ចំរើនអភិបាលក្រុងស្វាយរៀងបានជំរុញលើកទឹកចិត្តបងប្អូនប្រជាកសិករក្នុងការដាំដុះដំណាំគ្រប់មុខ ចិញ្ចឹមសត្វ ដើម្បីផ្គត់ផ្គង់លើទីផ្សារក្នុងស្រុក។ ការថ្លែងបែបនេះគឺនៅក្នុងពិធីសំណេះសំណាល និងសួរសុខទុក្ខបងប្អូនប្រជាកសិករនៅភូមិទទា សង្កាត់ចេក និងភូមិធ្លក សង្កាត់សង្ឃ័រ ក្រុងស្វាយរៀងនាព្រឹកថ្ងៃទី២១ ខែកក្កដា ឆ្នាំ២០២០។
ក្នុងពិធីនោះក៏មានការអញ្ជើញចូលរួមពីលោកនាយករងរដ្ឋបាលសាលាក្រុង លោកអនុប្រធានការិយាល័យសេដ្ឋកិច្ច និងអភិវឌ្ឍន៍សហគមន៍ លោកអនុប្រធានការិយាល័យសង្គមកិច្ច និងសុខុមាលភាពសង្គម និងមន្ត្រីសាលាក្រុង លោកមេភូមិទទា និងចៅសង្កាត់ចេកផងដែរ។
លោកអភិបាលក្រុងក៏បានជម្រាបជូនអំពីវិធានការ និងការចូលរួមទប់ស្កាត់ជំងឺឆ្លងកូវីដ-១៩ ជាពិសេសនៅរដូវវស្សានេះ ការពារក្មេងតូចៗកុំឲ្យមូសខាំឆ្លងជំងឺគ្រុនឈាម ហើយបានគាំទ្រ និងកោតសរសើរពីកិច្ចខិតខំយកចិត្តទុកដាក់ប្រកបរបរកសិកម្មនេះ ជាពិសេសជំរុញលើកទឹកចិត្តដល់បងប្អូនប្រជាកសិករក្នុងការដាំដុះដំណាំគ្រប់មុខ ចិញ្ចឹមសត្វ ដើម្បីផ្គត់ផ្គង់លើទីផ្សារក្នុងស្រុក និងការចងជាសហគមន៍ដើម្បីធ្វើការនាំចេញទៅលក់នៅផ្សារទំនើបក្នុងព្រះរាជាណាចក្រកម្ពុជា ជាការរួមចំណែកក្នុងកិច្ចអភិវឌ្ឍសេដ្ឋកិច្ចគ្រួសារ និងសង្គមជាតិ៕ យឹម សុថាន
