សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ប្រធានាធិបតីអាមេរិក ដូណាល់ត្រាំ នៅថ្ងៃទី៣០ ខែកក្កដា បានអំពាវនាវឲ្យពន្យារពេលបោះឆ្នោត អាមេរិក ដែលត្រូវធ្វើឡើងនៅដើម ខែវិច្ឆិកា ឆ្នាំ២០២០ ។
លោកត្រាំបានលើកយកមូលហេតុថា ការបោះឆ្នោតនិងមានការបន្លំប្រសិនបើបោះឆ្នោតផ្ញើតាមប្រៃសណីយ៍ ។ លោកត្រាំ ស្នើឲ្យ ពន្យារពេលបោះឆ្នោតឆ្នាំ២០២០ រហូតដល់ពលរដ្ឋអាចទៅបោះឆ្នោត ដោយមានសុវត្ថិភាព និងសន្តិសុខ។
លោកត្រាំបង្ហាញក្តីបារម្ភថា ការបោះឆ្នោតតាមរូបភាពផ្ញើសំបុត្រតាមប្រៃសណីយ៍ សម្រាប់ការបោះឆ្នោតឆ្នាំ ២០២០ នេះ និងក្លាយជាការបោះឆ្នោត មិនមានតម្លាភាព និងការកេងបន្លំទ្រង់ទ្រាយធំបំផុតក្នុងប្រវត្តិសាស្ត្រអាមេរិក។
សារព័ត៌មានរ៉យទ័រ បានផ្សាយថា សំណើររបស់លោកត្រាំ បានបង្កឲ្យមានវិវាទយ៉ាងខ្លាំង ដោយសារតែការបោះឆ្នោតអាមេរិក បានកំណត់យ៉ាងច្បាស់នៅក្នុងច្បាប់រដ្ឋធម្មនុញ្ញ។
តាមសារព័ត៌មាន CNN រដ្ឋាភិបាលអាមេរិក និងបុគ្គលប្រធានាធិបតី គ្មានសិទ្ធក្នុងការពន្យារពេលបោះឆ្នោតនោះឡើយ។ តាមច្បាប់រដ្ឋធម្មនុញ្ញ មានតែរដ្ឋសភា ទើបមានសិទ្ធគ្រប់គ្រាន់ក្នុងការពន្យារពេលបោះឆ្នោត។
ក្រុមអ្នកប្រឆាំងប្រធានាធិបតីដូណាល់ ត្រាំបានលើកឡើងថា សកម្មភាពខាងលើ របស់លោកត្រាំ គឺដោយសារតែ លោកចង់អូសបន្លាយពេលវេលា ដើម្បីស្វែងរកគន្លឹះ យកឈ្នះបេក្ខភាពមកពីគណបក្សប្រជាធិបតេយ្យ ។ ការស្ទង់មតិ នាពេលកន្លងមក លោក ត្រាំ បាត់បង់ការគាំទ្រយ៉ាងខ្លាំងពីមហាជន៕
ដោយ៖ធី រីណា
