សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ តារាហុងកុងសម្តែងប្រុសល្បីមួយរូប ប្រចាំស្ថាននីយទូរទស្សន៍TVB ត្រូវបានប៉ូលិស ធ្វើការឃាត់ខ្លួនកាលពីយប់ថ្ងៃទី៧ ខែសីហាម្សិលមុិញនេះ បន្ទាប់ពីរូបគាត់បានធ្វើការបើកបរ រថយន្តទាំងក្នុងស្ថានភាពស្រវឹងជោគជាំ ហើយបង្កគ្រោះថ្នាក់ ចរាចរណ៍ ប៉ុន្តែសំណាងល្អមិនមានអ្នករងរបួសនោះទេ។
បើតាមសារព័ត៌មានOriental Daily បានចុះផ្សាយនៅថ្ងៃទី៨ ខែសីហា ឆ្នាំ២០២០នេះថា កាលពីយប់ថ្ងៃទី៧ ខែសីហាមានករណីគ្រោះថ្នាក់ចរាចរណ៍មួយបង្កឲ្យមានការភ្ញាក់ផ្អើល បន្ទាប់ពីប្រជាពលរដ្ឋបានឃើញរថយន្តMercedes-Benz មួយគ្រឿង បានធ្វើដំណើរយ៉ាងលឿនឆ្លងកាត់ផ្លូវផ្ទុយគ្នា ហើយបានជ្រុលទៅបុកចញ្ចើមផ្លូវសម្រាប់អ្នកថ្មើរជើង អស់ជិត ៦០ម៉ែត្រ ហើយរថយន្តនោះក៏ជាប់គាំងមិនអាចធ្វើដំណើរបន្តទៅមុខទៀតបានប៉ុន្តែសំណាងល្អគ្មាន អ្នករងរបួសនោះទេ គ្រាន់តែខូចខាតរថយន្តយ៉ាងដំណំ។
ក្រោយកើតហេតុ ខាងប៉ូលិសក៏បានចុះមកដល់ហើយធ្វើការវាស់វែង និងឈានដល់ការឃាត់ខ្លួន ម្ចាស់រថយន្តខាងលើ ដែលត្រូវបានគេស្គាល់ថាជា តារាប្រុសMatt Yeung ក្នុងស្ថានភាព អស់កម្លាំងជាខ្លាំង ខ្លួនឡើងទន់ ជាហេតុមិនអាច ធ្វើការវាស់ជាតិអាល់កុលបាន ។ ទើបប៉ូលិសក៏បានហៅឡានពេទ្យ ដឹកបញ្ជូនតារាប្រុសរូបនេះ ទៅសង្គ្រោះនៅមន្ទីពេទ្យភា្លមៗផងដែរ ។
គួរបញ្ជាក់ថា តារាប្រុសរូបនេះ ក៏ត្រូវបានជាប់ឈ្មោះ ក្នុងតារាបញ្ជីខ្មៅblacklist របស់ប៉ូលិសផងដែរ ដោយសារតែកន្លងមកខ្លួនធា្លប់មានប្រវត្តិស្រវឹងហើយបើកបររំខាន ដល់សណ្តាប់ធ្នាប់សាធារណៈជាច្រើនលើក ច្រើនសារមកហើយ៕ដោយ៖ស តារា
