សារព័ត៌មាន នគរវត្ត តែងតែនាំមុខគេជានិច្ច
បន្ទាយមានជ័យ៖ នៅវេលាម៉ោង០៥និង០០នាទី ថ្ងៃទី១៩ ខែ សីហា ឆ្នាំ២០២០ លោក វរសេនីយ៍ត្រី នួន នីណារ៉ូ មេបញ្ជាការ មូលដ្ឋាន អាវុធហត្ថក្រុងប៉ោយប៉ែត បានដឹកនាំកម្លាំងចុះល្បាតក្នុងភូមិសាស្រ្តដល់ចំណុចភូមិក្បាលស្ពាន១ កម្លាំងបានប្រទះឃើញបុរសម្នាក់អង្គុយកន្លែងទី ងងឹត ដោយមានការសង្ស័យកម្លាំងបានចុះទៅត្រួតពិនិត្យឃើញកំពុងប្រើប្រាស់គ្រឿងញៀនហើយក៏ធ្វើការឃាត់ខ្លួនតែម្តង នឹងបានដកហូតវត្ថុតាងរួមមានឧបករណ៍សម្រាប់ប្រើប្រាស់គ្រឿងញៀន ,ដបថ្នាំកេតាមីន(ទទេ) និងសឺរាំងចាក់ថ្នាំមួយចំនួន។
លោកវរសេនីយ៍ត្រី នួន នីណារ៉ូ បានឱ្យដឹងថាជនសង្ស័យជាជនជាតិថៃឈ្មោះ អាការ៉ាផុន អាសានាវិត ភេទប្រុស អាយុ៣៤ឆ្នាំ ធ្លាប់ធ្វើជាបុគ្គលិកកាស៊ីណូអនឡាញ ដែលស្នាក់នៅបន្ទប់ជួល ស្ថិតក្នុងភូមិក្បាលស្ពាន១ សង្កាត់ប៉ោយប៉ែតក្រុងប៉ោយប៉ែត ខេត្តបន្ទាយមានជ័យ ហើយនាំខ្លួនមកអាវុធហត្ថក្រុងដើម្បីធ្វើការសាកសួរ។ ជនសង្ស័យបានឆ្លើយសារភាពថា ខ្លួនគេពិតបានប្រើប្រាស់គ្រឿងញៀនពិតប្រាកដមែន ដោយយោងតាមចម្លើយសារភាពនិងមានវត្ថុតាងផងនោះ កម្លាំងជំនាញគ្រឿងញៀនអាវុធហត្ថក្រុងបានកសាងសំណុំរឿងបញ្ជូនមកបញ្ជាការដ្ឋានអាវុធហត្ថខេត្តចាត់ការបន្ត។ បច្ចុប្បន្ន ជនសង្ស័យត្រូវបានកម្លាំងជំនាញគ្រឿងញៀនអាវុធហត្ថខេត្ត បញ្ជូនទៅសាលាដំបូងខេត្តចាត់ការតាមច្បាប់៕ដោយ៖ស សម
