សារព័ត៌មាន នគរវត្ត តែងតែនាំមុខគេជានិច្ច
ក្រសួងសុខាភិបាលអុីតាលី បានប្រកាសឲ្យដឹងថា មានករណីឆ្លងកូវីដ-១៩ថ្មីត្រូវបានរកឃើញមានដល់ទៅ១.០៧១នាក់ ក្នុងរយៈពេល២៤ម៉ោង គឺជាចំនួនយ៉ាងច្រើនបំផុតមិនធ្លាប់មានចាប់តាំងពីខែឧសភា មកទល់ពេលនេះ។ នេះជាលើកទីមួយហើយដែលអុីតាលីមានអ្នកឆ្លងលើសពី១ពាន់នាក់ក្នុងមួយថ្ងៃ។
អុីតាលីគឺជាប្រទេសដែលរងផលប៉ះពាល់ខ្លាំងជាងគេបំផុតដោយកូវីដ-១៩ នៅក្នុងតំបន់អឺរ៉ុប ដោយមានករណីឆ្លង២៥៨,១៣៦នាក់ និងស្លាប់ដល់ទៅ៣៥ពាន់នាក់។ ពេលវេលាដែលឆ្លងរាលដាលនិងស្លាប់ច្រើនជាងគេបំផុតចាប់ពីខែមីនា ដល់ខែមេសា ហើយតាំងពីខែឧសភាមក អុីតាលីបានទប់ស្កាត់យ៉ាងល្អ ដោយមិនមានអ្នកឆ្លងលើសពី១ពាន់នាក់ឡើយក្នុងមួយថ្ងៃ។
ចំនួនអ្នកឆ្លងកូវីដ-១៩ ខ្ពស់បំផុតដែលអុីតាលីរកឃើញចុងក្រោយ គឺនៅថ្ងៃទី១២ខែឧសភាឆ្នាំ២០២០ នៅពេលនោះមានអ្នកឆ្លង ១.៤០២នាក់។ ការរកឃើញមុនពេល៦ថ្ងៃដែលអ៊ុីតាលីអនុញ្ញាតឲ្យ ភោជនីយដ្ឋាន បារ ក្លិប បើកទ្វារដំណើរការអាជីវកម្មរបស់ខ្លួនឡើងវិញក្រោយបិទទ្វារជាង១០សប្តាហ៍មក។
លោក Francesco Vaia អគ្គនាយកមន្ទីរពេទ្យSpallanzani នៅទីក្រុង រ៉ូម ប្រទេសអុីតាលី បានឲ្យដឹងថា ភាគច្រើនអ្នកឆ្លងកូវីដ វិធីសាស្ត្រទប់ស្កាត់កូវីដ-១៩រាលដាល គឺត្រូវតែត្រួតពិនិត្យ ធ្វើតេស្តនៅតាមមធ្យោបាយធ្វើដំណើរផ្សេងៗ មាន រថភ្លើង នាវា យន្តហោះជាដើម ជាវិធីសាស្ត្រទប់ស្កាត់ការឆ្លងរាលដាល។
ក្រុមអ្នកជំនាញបានលើកឡើងថា មិនថាតែនៅប្រទេសអុីតាលី ឬប្រទេសតំបន់អឺរ៉ុបផ្សេងទៀតនោះឡើយ គឺនៅជុំវិញពិភពលោកទាំងមូលមានករណីឆ្លងកើនឡើងខ្ពស់ដូចគ្នា ដោយសារតែប្រទេសជាច្រើនសម្រេចបើកទ្វារជួយដល់សេដ្ឋកិច្ចជាតិដំណើរការឡើងវិញ។ ដោយឡែកនៅតំបន់អឺរ៉ុបមានប្រទេសមួយចំនួនបានអនុញ្ញាតឲ្យអ្នកទេសចរក្នុងតំបន់ទៅកម្សន្តក្នុងប្រទេសរបស់ខ្លួន ដោយមិនចាំបាច់ធ្វើចត្តាឡីស័កឡើយ៕
ដោយ៖ធី រីណា
