សារព័ត៌មាន នគរវត្ត តែងតែនាំមុខគេជានិច្ច
ជ័យជំនះក្នុងពានរង្វាន់លីគកំពូលអឺរ៉ុបរបស់ក្លិប Bayern Munich ក្នុងទីក្រុងលីសបោនបានបង្កើតឱកាសឲ្យក្លិបនេះទៅប្រកួតពានរង្វាន់ UEFA Super Cup ជាមួយក្រុម Sevilla នៅខែកញ្ញាខាងមុខ។
កីឡដ្ឋាន Budapest នឹងត្រូវធ្វើជាម្ចាស់ផ្ទះក្នុងវគ្គផ្តាច់ព្រ័ត្រពានរង្វាន់ UEFA Super Cup នៅថ្ងៃទី២៤ ខែកញ្ញា ខណៈ Sevilla សង្ឃឹមថានឹងអាចឈ្នះពានរង្វាន់ UEFA Super Cup ជាលើកទី២របស់ពួកគេបន្ទាប់ពីទទួលបានជ័យជំនះលើ Barcelona កាលពីឆ្នាំ២០០៦ ។
កាលពីថ្ងៃទី១៩ ខែសីហា UEFA បានរៀបចំកិច្ចប្រជុំមួយតាមវីដេអូឃ្លីបមួយជាមួយសមាជិករបស់ខ្លួនចំនួន៥៥រូបដែលបានស្នើរឱ្យប្រើការប្រកួតរវាង Sevilla និង Bayern Munich ជាការកាត់ក្តីដើម្បីអនុញ្ញាតឱ្យអ្នកគាំទ្រវិលត្រឡប់ទៅកីឡដ្ឋានវិញ ប៉ុន្តែសេចក្តីប្រកាសថានឹងឲ្យអ្នកគាំទ្រចូលទស្សនាផ្ទាល់លើទីលាននេះមិនទាន់មានជាផ្លូវការនៅឡើយទេ ។
ក្រុមទាំងពីរទើបតែជួបគ្នាម្តងរួចមកហើយដោយវគ្គ១ភាគ៤ផ្តាច់ព្រ័ត្រក្នុងការប្រកួតដណ្តើមពានរង្វាន់ Champions League រដូវកាល២០១៧-២០១៨ ពេលនោះក្រុម Bayern Munich ឈ្នះទាំង២ជើងក្នុងលទ្ធផល ២-១។
សូមបញ្ជាក់ថា ពានរង្វាន់ UEFA Super Cup គឺត្រូវបានកំណត់ឲ្យក្រុមចំនួន២ប្រកួតគ្នាគឺក្រុមដែលឈ្នះជើងឯក UEFA Europa League និងក្រុមដែលឈ្នះពានរង្វាន់ Champions League ក្នុងរដូវកាលជាមួយគ្នា។ សម្រាប់ឆ្នាំនេះក្រុម Bayern Munich ជាអ្នកគ្រងជើងឯក Champions League ក្រោយឈ្នះក្រុម PSG ១ទល់០ ខណៈដែលក្រុម Sevilla ជាអ្នកគ្រងជើងឯក UEFA Europa League ក្រោយយកឈ្នះក្រុម Inter Milan ក្នុងលទ្ធផល ៣ទល់២ ៕ ដោយ៖ភារៈ
