សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅរសៀថ្ងៃទី០២ ខែកញ្ញា ឆ្នាំ២០២០ សហព្រះរាជអាជ្ញាជាតិ នៃអង្គជំនុំជម្រះវិសាមញ្ញក្នុងតុលាការកម្ពុជា បានចេញសេចក្តីប្រកាសព័ត៌មាន អំពីមរណភាពរបស់ទណ្ឌិត កាំង ហ្កេកអ៊ាវ ហៅ ឌុច។
ក្នុងនោះសហព្រះរាជអាជ្ញាជាតិ សូមជម្រាបជូនសាធារណជនឱ្យបានជ្រាបថា ទណ្ឌិត កាំង ហ្កេកអ៊ាវ ហៅ ឌុច បានទទួលមរណភាព នៅមន្ទីរពេទ្យមិត្តភាពខ្មែរសូវៀត វេលាម៉ោង ០០:៥១ នាថ្ងៃទី០២ ខែកញ្ញា ឆ្នាំ ២០២០ នេះ។
ទណ្ឌិត តាំង ហ្កេកអ៊ាវ ហៅ ឌុច កើតនៅថ្ងៃទី១៧ ខែវិច្ឆិកា ឆ្នាំ១៩៤២ នៅភូមិពៅវើយ ឃុំពាមបាង ស្រុងស្ទោង ខេត្តកំពង់ធំ សញ្ជាតិខ្មែរ មុខរបរគ្រូបង្រៀន ជាប្រធានមន្ទីរសន្តិសុខ ស -២១។ គាត់ត្រូវ បានចាប់ និងឃុំខ្លួននៅថ្ងៃទី១០ ខែឧសភា ឆ្នាំ១៩៩៩ ហើយនៅថ្ងៃទី៣០ ខែកក្កដា ឆ្នាំ២០១៧ ត្រូវបាន ផ្ទេរមកឃុំខ្លួនក្នុងមន្ទីរឃុំឃាំងរបស់អង្គជំនុំជម្រះវិសាមញ្ញក្នុងតុលាការកម្ពុជា (អ . វ . ត. ក)។ នៅថ្ងៃទី៣១ ខែកក្កដា ឆ្នាំ២០០៧ ត្រូវបានដាក់ឲ្យស្ថិតនៅក្រោមការពិនិត្យពីបទឧក្រិដ្ឋកម្មប្រឆាំងមនុស្សជាតិ បទ បំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ ចុះថ្ងៃទី ១២ ខែសីហា ឆ្នាំ១៩៤៩ និងអំពើ ទារុណកម្ម និងមនុស្សឃាត ដែលមានចែងក្នុងក្រមព្រហ្មទណ្ឌឆ្នាំ១៩៥៦។ នៅថ្ងៃទី៣០ ខែមីនា ឆ្នាំ២០០៩ អង្គជំនុំជម្រះសាលាដំបូង បានបើកសវនាការដើម្បីជំនុំជម្រះលើ កាំង ហ្កេកអ៊ាវ ហៅ ឌុច ហើយបានធ្វើសវនាការដេញដោលភស្តុតាង ស្តាប់សក្ខីកម្មសាក្សី និងដើមបណ្តឹង រដ្ឋប្បវេណី ដែលបានចំណាយពេលវេលាអស់រយៈពេល ៧២ថ្ងៃ។ នៅថ្ងៃទី២៦ ខែកក្កដា ឆ្នាំ២០១០ សាលក្រមត្រូវបានប្រកាស ដោយបានរកឃើញថា កាំង ហ្គេក អ៊ាវ ហៅ ឌុច ជាអ្នកទទួលខុសត្រូវមន្ទីរសន្តិសុខ ស-២១ អស់រយៈពេលជាង ៣ ឆ្នាំ ដែលបណ្តាលឱ្យមានការសម្លាប់ជនរងគ្រោះជាង ១២២៧២ នាក់។ ហេតុដូច្នេះ អង្គជំនុំជម្រះសាលាដំបូង បានសម្រេចផ្តន្ទាទោស កាំង ហ្កេកអ៊ាវ ហៅ ឌុច ដាក់ពន្ធនាគាររយៈពេល ៣៥ ឆ្នាំ ពីបទការសម្លាប់រង្គាល ការធ្វើមនុស្ស ឃាត ការធ្វើឲ្យទៅជាទាសករ ការដាក់ក្នុងមន្ទីរឃុំឃាំង ការធ្វើទារុណកម្ម និងអំពើអមនុស្សធម៌ផ្សេងៗ ទៀត នៃឧក្រិដ្ឋកម្មប្រឆាំងមនុស្សជាតិ ព្រមទាំងការធ្វើមនុស្សឃាតដោយចេតនា ការធ្វើទារុណកម្ម និង ការធ្វើបាបដោយអមនុស្សធម៌ ការបង្កដោយចេតនាឲ្យមានរបួសធ្ងន់ធ្ងរ ឬឲ្យមានការឈឺចាប់ដល់រាងកាយ និងសុខភាព ការដកហូតដោយចេតនាពីឈ្លើយសឹក ឬជនស៊ីវិល នូវសិទ្ធិទទួលបានការកាត់ទោសដោយ យុត្តិធម៌ និងទៀងទាត់ និងការឃុំខ្លួនជនស៊ីវិលដោយខុសច្បាប់ នៃបទបំពារបំពានយ៉ាងធ្ងន់ធ្ងរទៅលើអនុ សញ្ញាទីក្រុងហ្សឺណែវ ចុះថ្ងៃទី១២ ខែសីហា ឆ្នាំ១៩៤៩។
សាលក្រមរបស់អង្គជំនុំជម្រះសាលាដំបូងនេះ ត្រូវបានសហព្រះរាជអាជ្ញា ដើមបណ្តឹងរដ្ឋប្បវេណី និង កាំង ហ្កេកអ៊ាវ ហៅ ឌុច ប្តឹងសាទុក្ខទៅអង្គជំនុំជម្រះតុលាការកំពូល។ នៅថ្ងៃទី០៣ ខែកុម្ភៈ ឆ្នាំ ២០១២ អង្គជំនុំជម្រះតុលាការកំពូល បានចេញសាលដីកាសម្រេចផ្តន្ទាទោស កាំង ហ្កេកអ៊ាវ ហៅ ឌុច ដាក់ពន្ធនាគារអស់មួយជីវិត។
កាំង ហ្កេកអ៊ាវ ហៅ ឌុច ត្រូវបានបញ្ជូនទៅពន្ធនាគារខេត្តកណ្តាល នៅថ្ងៃទី០៦ ខែមិថុនា ឆ្នាំ ២០១៣ ដើម្បីអនុវត្តទោស បន្ទាប់ពីការសម្រេចរបស់អង្គជំនុំជម្រះតុលាការកំពូល។
ថ្ងៃនេះ សហព្រះរាជអាជ្ញាជាតិ ជូនដំណឹងថា កាំង ហ្កេកអ៊ាវ ហៅ ឌុច បានទទួលមរណភាព រដោយផ្អែកតាមរបាយការណ៍របស់មន្ត្រីពាក់ព័ន្ធ ហើយចំពោះការស៊ើបអង្កេតពាក់ព័ន្ធនឹងមូលហេតុនៃ មរណភាពរបស់ទណ្ឌិត កាំង ហ្កេកអ៊ាវ ហៅ ឌុច ជាសមត្ថកិច្ចរបស់អាជ្ញាធរជាតិ៕
ដោយ៖ សុខ ខេមរា
