សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ថ្នាក់ដឹកនាំបណ្តាប្រទេសជាសមាជិកអង្គការសហប្រជាជាតិទាំង១៩៣ប្រទេស នៅថ្ងៃទី២១ខែកញ្ញានេះ បានជួបប្រជុំគ្នាជាពិសេសក្នុងឱកាសខួបគម្រប់៧៥ឆ្នាំថ្ងៃបង្កើតអង្គការនេះ។
កិច្ចប្រជុំពិសេសគឺជាការបើកផ្លូវសម្រាប់សប្តាហ៍ជាន់ខ្ពស់នៃមហាសន្និបាត អង្គការសហប្រជាជាតិលើកទី៧៥។ ប៉ុន្តែកិច្ចប្រជុំលើកនេះខុសប្លែកពីរាល់ឆ្នាំគឺប្រជុំអនឡាញធំបំផុត មិនធ្លាប់មាន ដោយសារតែការឆ្លងរាលដាលកូវីដ-១៩ ។
នៅក្នុងមហាសន្និបាតលើកនេះ មេដឹកនាំជុំវិញពិភពលោក នឹងផ្ញើឃ្លីបវីដេអូស្តីពីសុន្ទរកថារបស់ថ្នាក់ដឹកនាំប្រទេសនីមួយៗ ជំនួសដល់ការថ្លែងនៅទីស្នាក់ការអង្គការសហប្រជាជាតិ។
មានប្រសាសន៍ទៅកាន់ក្រុមអ្នកសារព័ត៌មាន មុនពេលបើកកិច្ចប្រជុំអគ្គលេខាធិការអង្គការសហប្រជាជាតិ លោកAntonio Guterres បានប្រកាសថា វត្តមានរបស់វីរុសកូវីដ-១៩ រាលដាលនៅជុំវិញពិភពលោក គឺជាសញ្ញានៃភាពទន់ខ្សោយក្នុងទំនាក់ទំនង សាមគ្គីគ្នារបស់ពិភពលោក ។ លោកAntonio Guterres បានអំពាវនាវដល់ប្រទេសទាំងអស់រួមសាមគ្គីគ្នាទប់ស្កាត់សត្រូវរួមរបស់ពិភពលោក។
លោកAntonio Guterres បន្តទៀតថា«ក្នុងឱកាសខួបគម្រប់ ៧៥ឆ្នាំថ្ងៃបង្កើតអង្គការសហប្រជាជាតិ មនុស្សជាតិបានប្រឈមមុខដូចកាលពីឆ្នាំ១៩៤៥។ នៅពេលនេះយើងចាំបាច់ត្រូវតែសាមគ្គីឆ្លងផុតរាល់ឧប្បសគ្គទាំងអស់» ៕ដោយ៖ធី រីណា
