សារព័ត៌មាន នគរវត្ត តែងតែនាំមុខគេជានិច្ច
កាលពីថ្ងៃទី២៨ ខែកញ្ញា ប្រធានាធិបតីហ្វុីលីពីនលោក Rodrigo Duterte បានប្រកាសថា នឹងបន្តច្បាប់គម្លាតសង្គមនៅទីក្រុងម៉ានីលបន្ថែមមួយខែទៀតដើម្បីទប់ស្កាត់ការឆ្លងរាលដាលកូវីដ-១៩ ។ច្បាប់ទប់ស្កាត់ការឆ្លងកូវីដ-១៩ ត្រូវអូសបន្លាយដល់ថ្ងៃទី៣១ខែតុលា។
នៅក្នុងសុន្ទរកថាដែលបានផ្សាយតាមបញ្ចក់ទូរទស្សន៍ ប្រធានាធិបតី Duterteបានអំពាវនាវដល់ ក្រុមហ៊ុនទូរគមនាគមន៍បន្តអនុវត្តការងាររបស់ខ្លួនឱ្យបានល្អប្រសើរជាងនេះចំពោះសាលារៀនឯកជនដើម្បីធានាដល់ការបង្រៀនតាមអនឡាញប្រកបដោយប្រសិទ្ធភាព ។ ការបង្រៀនតាមអនឡាញនឹងត្រូវបើកដំណើរការវិញហើយនៅថ្ងៃទី៥ ខែតុលា ។
ក្នុងថ្ងៃជាមួយគ្នានេះដែរ ហ្វុីលីពីន បានបញ្ជាក់ថា បានរកឃើញករណីឆ្លងកូវីដ-១៩ថ្មីចំនួន៣.០៧៣នាក់ និងស្លាប់៣៧នាក់ ។ មកដល់ថ្ងៃនេះហ្វុីលីពីនមានអ្នកឆ្លងសរុបកើនឡើងដល់ទៅ ៣០៧.២៨៨ នាក់ និងស្លាប់៥.៣៨១នាក់ច្រើនបំផុតក្នុងតំបន់អាស៊ាន។
បច្ចុប្បន្ននៅលើពិភពលោកមានករណីឆ្លងកូវីដ-១៩ដល់ទៅជាង៣៣,៥លាននាក់និងស្លាប់ជាង១លាននាក់ ក្នុងនោះមាន៤ប្រទេសមានអ្នកឆ្លងលើសពី១លាននាក់ គឺអាមេរិក មានអ្នកឆ្លងជាង៧លាននាក់, ឥណ្ឌាមានអ្នកឆ្លងជាង៦លាននាក់, ប្រេស៊ីលមានអ្នកឆ្លងជាង៤លាននាក់ និងរុស្ស៊ីមានអ្នកឆ្លងជាង១លាននាក់។
សូមបញ្ជាក់ថា ក្នុងចំណោមប្រទេសនិងដែនដីទាំង២១៣ ហ្វុីលីពីនឈរលំដាប់ទី២១ក្នុងតារាងរបស់គេហទំព័រ Worldometers និងឈរលំដាប់លេខ៤ក្នុងតំបន់អាស៊ី បន្ទាប់ពី ឥណ្ឌា បង់ក្លាដែស និងអុីរ៉ាក់៕ដោយ៖ធី រីណា
