សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ លោក បៀល ហ្គេតស៍ (Bill Gates) ដែលជាស្ថាបនិកក្រុមហ៊ុនMicrosoft និងជាកំពូលមហាសេដ្ឋីមួយរូបនៅសហរដ្ឋអាមេរិកកាលពីថ្ងៃអង្គារទី៦ ខែតុលា ឆ្នាំ២០២០ បានអះអាងថា៖ ក្រុមប្រទេសអ្នកមានទាំងឡាយ អាចនឹងវិលទៅរកសភាពធម្មតាវិញនៅចុងឆ្នាំ២០២១ ប្រសិនបើវ៉ាក់សាំងប្រឆាំងជំងឺ COVID-19 មានប្រសិទ្ធិភាព និងត្រៀមរួចជាស្រេចដើម្បីធ្វើការចែកចាយទ្រទ្រាយធំ។
ថ្លែងប្រាប់ក្រុមប្រឹក្សានាយករបស់កាសែតអាមេរិក The Wall Street Journal លោក បៀល ហ្គេតស៍ បានបញ្ជាក់យ៉ាងដូច្នេះថា៖ នៅចុងឆ្នាំ២០២១ អ្វីៗនឹងវិលត្រឡប់មករកសភាពធម្មតាវិញ នោះគឺជាសេណារីយ៉ូដ៏ល្អបំផុត។ យើងនៅមិនទាន់ដឹងទេថា តើវ៉ាក់សាំងទាំងអស់ដែលកំពុងស្ថិតនៅក្នុងការធ្វើតេស្ត អាចទទួលជោគជ័យនៅឡើយនោះ។ បន្ថែមពីនេះលោក បៀល ហ្គេតស៍ ក៏បានសង្កត់ធ្ងន់ថា ឥឡូវនេះការបង្កើនសមត្ថភាពក្នុងការផលិតវ៉ាក់សាំង ត្រូវបានគិតគូរជាចម្បង ហើយនៅពេលផលិតបានសម្រេច យើងត្រូវការពេលសម្រាប់បែងចែកវ៉ាក់សាំង នៅសហរដ្ឋអាមេរិក និងបណ្តាប្រទេសជាគោលដៅផ្សេងៗទៀត។
ជុំវិញនឹងបញ្ហាខាងលើនេះដែរ ប្រធានអង្គការសុខភាពពិភពលោក (WHO) លោក ថេដ្រូស អាដាណម (Tedros Adhanom Ghebreyesus) បានគូសបញ្ជាក់ថា វ៉ាក់សាំងប្រឆាំងជំងឺ COVID-19 អាចនឹងត្រៀមរួចរាល់នៅចុងឆ្នាំ២០២០នេះ។ ខណៈបេក្ខភាពវ៉ាក់សាំងCOVID-19 ដែលអភិវឌ្ឍដោយក្រុមហ៊ុន ភីហ្វីហ្សឺ (Pfizer), បាយអូនអិនធិច (BioNTech), អាស្ត្រាហ្សេណេកា (AstraZeneca) និងសាកលវិទ្យាល័យ អក់ស៍ហ្វដ (Oxford) គឺជាបេក្ខភាពវ៉ាក់សាំងឈានមុខ ដែលកំពុងប្រណាំងប្រជែងគ្នាក្នុងការអភិវឌ្ឍ ដើម្បីទទួលបានការយល់ព្រមផ្នែកច្បាប់ នៅក្នុងប្រទេសលោកខាងលិច។
គួររម្លឹកផងដែរថា កាលពីខែមុនមូលនិធិ បៀល និង មេលីនដា ហ្គេតស៍ (Bill & Melinda Gates) បានចុះហត្ថលេខាលើកិច្ចព្រមព្រៀងមួយជាមួយក្រុមហ៊ុនអភិវឌ្ឍឱសថសរុបចំនួន ១៦ ដោយក្នុងនោះលោក Gates បានសង្កត់ធ្ងន់ថា ក្រុមហ៊ុនទាំងនោះបានធ្វើការប្តេជ្ញាចិត្តថា នឹងបង្កើនផលិតកម្មក្នុងល្បឿនដែលមិនធ្លាប់មានពីមុនមក ព្រមទាំងធ្វើឲ្យប្រាកដថា វ៉ាក់សាំងនឹងទទួលបានការអនុម័ត និងឈានដល់ការចែកចាយយ៉ាងទូលំទូលាយឲ្យបានឆាប់បំផុត៕ដោយ៖ស តារា
