សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ចំពោះអំពើឃាតកម្មដ៏ព្រៃផ្សៃបំផុត បន្ទាប់ពីមានករណីគ្រូបង្រៀនម្នាក់ ត្រូវគេកាត់ក្បាល នៅជាយទីក្រុងប៉ារីស បានធ្វើឲ្យប្រធានាធិបតីបារាំងលោក អ៊ែមម៉ានុយអ៊ែល ម៉ាក្រុង (Emmanuel Macron) នៅថ្ងៃសុក្រទី១៦ ខែតុលាម្សិលមិញនេះ បានចាត់ទុកថាជា«ការវាយប្រហារដោយអំពើភេរវកម្ម» ។ មិនតែប៉ុណ្ណោះមេដឹកនាំបារាំងរូបនេះ ក៏បានអំពាវនាវឲ្យពលរដ្ឋទាំងអស់ឈរជាធ្លុងមួយ និងសន្យាថារដ្ឋាភិបាលរបស់លោក នឹងចាត់វិធានជាបន្ទាន់ដើម្បីប្រយុទ្ធប្រឆាំងនឹងអំពើភេរវកម្ម។ នេះបើតាមការចេញផ្សាយដោយសារព័ត៌មានចិនស៊ីនហួរ នាព្រឹកថ្ងៃសៅរ៍ ទី១៧ ខែតុលា ឆ្នាំ២០២០។
ថ្លែងប្រាប់អ្នកសារព័ត៌មាន លោក អ៊ែមម៉ានុយអ៊ែល ម៉ាក្រុង បានធ្វើឡើងបន្ទាប់ពីដំណើរទស្សនៈកិច្ចទៅកាន់អនុវិទ្យាល័យមួយនៅក្នុងតំបន់កុងហ្វ្លង់ហ្សង់ អូណីនែន (Conflans-Sainte-Honineine) បានមួយម៉ោងបន្ទាប់ពីគ្រូបង្រៀនមា្នក់ត្រូវបានធ្វើឃាត ខណៈដែលគាត់កំពុងបង្រៀនសិស្សអំពីសិទ្ធិសេរីភាពក្នុងការបញ្ចេញមតិ។ លោកប្រធានាធិបតីបារាំងបានបញ្ជាក់បន្ថែមថា ភេរវករដែលបានសម្លាប់គ្រូបង្រៀនរូបនោះ ដោយសារតែពួកគេចង់បំផ្លាញសាធារណរដ្ឋ… បំផ្លាញលទ្ធភាពនៃការធ្វើឲ្យមនុស្សជំនាន់ក្រោយ យល់ដឹងអំពីសេរីភាព។ប្រធានាធិបតីរូបនេះ បានសង្កត់ធ្ងន់ថា ក្រុមភេរវករនឹងមិនបំបែកប្រទេសបារាំងបានឡើយ។
បើយោងតាមប្រព័ន្ធផ្សព្វផ្សាយក្នុងតំបន់កើតហេតុខាងលើ បានឲ្យដឹងថាជនរងគ្រោះគឺជាគ្រូបង្រៀនប្រវត្តិសាស្រ្តអាយុ ៤៧ឆ្នាំ ដែលត្រូវបានគេរាយការណ៍ថា លោកគ្រូរូបនេះបានបង្ហាញគំនូរជីវចលព្យាការីមហាម៉ាត់ដោយអ្នកគោរពសាសនាអ៉ីស្លាមចាត់ទុកថា «ជាការប្រមាថ» ហើយបន្ទាប់មករូបគាត់ត្រូវបានសម្លាប់ ដោយកាត់ក្បាលតែម្តង។ ចំណែកជនសង្ស័យដែលបង្ករឿងនេះមានអាយុ ១៨ឆ្នាំ ត្រូវបានប៉ូលិសល្បាតប្រទះឃើញ នៅក្នុងតំបន់នោះជាមួយនិងកាំបិតជាភស្តុតាង។
សេចក្តីរាយការណ៍ដដែលបន្តថា ជនដៃដល់រូបនោះបានស្រែកថា«ព្រះជាម្ចាស់អស្ចារ្យណាស់» មុនពេលបើកការវាយប្រហារ។ ប្រព័ន្ធផ្សព្វផ្សាយខាងលើបានរាយការណ៍ទៀតថា ប៉ូលិសបានបាញ់សម្លាប់ជនដៃដល់ ក្រោយពីជននោះបានតដៃ និងមិនព្រមឲ្យចាប់ខ្លួន។
សូមជម្រាបថា កាលពីដើមខែសីហា រដ្ឋមន្ត្រីក្រសួងមហាផ្ទៃលោក ហ្គែរ៉ាល់ដាម៉ាណង់ (Gerald Darmanin) បានកត់សំគាល់ថា ហានិភ័យនៃការវាយប្រហារភេរវកម្មនៅក្នុងប្រទេសបារាំង នៅតែមានកម្រិតខ្ពស់បំផុតដោយសារតែមនុស្សសរុបចំនួន ៨,១៣២នាក់ ត្រូវបានចុះឈ្មោះក្នុងបញ្ជីនៃការព្រមានថ្នាក់ជាតិ ចំពោះភាពជ្រុលនិយមផ្នែកសាសនា៕ដោយ៖ស តារា
