សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើយោងតាមការអះអាងពីអាជ្ញាធរកូរ៉េខាងត្បូង បញ្ជាក់ថា ក្នុងពេល១សប្ដាហ៍ចុងក្រោយនេះ មនុស្ស៥នាក់បានស្លាប់ក្រោយចាក់វ៉ាក់សាំងផ្ដាសាយរួចបានរយៈពេលតែ២ថ្ងៃប៉ុណ្ណោះ។ ប៉ុន្តែបើទោះជាស្លាប់ក្រោយចាក់វ៉ាក់សាំងផ្ដាសាយមែន អាជ្ញាធរអះអាងថា មិនទាន់មានភស្តុតាងណាបង្ហាញថា ករណីស្លាប់ទាំងនេះជាប់ទាក់ទងនឹងថ្នាំវ៉ាក់សាំងផ្ដាសាយនៅឡើយទេ ហើយអាជ្ញាធរកំពុងស៊ើបអង្កេតរឿងនេះ។ ចំណែកឯបញ្ហានេះ ក៏ជាកង្វល់ពាក់ព័ន្ធសុវត្ថិភាពវ៉ាក់សាំង ខណៈកម្មវិធីចាក់វ៉ាក់សាំងរដ្ឋ កំពុងពង្រីកដើម្បីកុំឲ្យស្មុគស្មាញជាមួយយុទ្ធនាការជំងឺកូវីដ-១៩។
សូមជម្រាបថា បើគិតមកត្រឹមថ្ងៃទី ២១ ខែតុលា មនុស្ស៨,៣លាននាក់បានចាក់វ៉ាក់សាំងផ្ដាសាយក្រោមកម្មវិធីរដ្ឋកូរ៉េខាងត្បូង។ រីឯភាពភ័យខ្លាចជុំវិញសុវត្ថិភាពវ៉ាក់សាំងផ្ដាសាយនេះ បានផ្ទុះឡើងកាលពីថ្ងៃ១៦ ខែតុលាកន្លងទៅ ក្រោយយុវជនម្នាក់ អាយុ១៧ឆ្នាំ បានស្លាប់ ២ថ្ងៃក្រោយចាក់វ៉ាក់សាំងរួច នៅក្នុងទីក្រុង Incheon។
ដោយឡែកករណីដូចគ្នានេះ បានកើតឡើងលើបុរសអាយុ៧៨ឆ្នាំម្នាក់ទៀតក្នុងខេត្ត North Jeolla និងបុរស៨២ឆ្នាំម្នាក់ទៀត ក្នុងទីក្រុងDaejeon កាលពីថ្ងៃទី ២០ ខែតុលា។ អ្នកទាំងពីរបានចាក់វ៉ាក់សាំងនៅថ្ងៃទី១៩ខែតុលា។ ចំណែកអ្នកស្លាប់២នាក់ចុងក្រោយ គឺបុរសកូរ៉េ៦៨ឆ្នាំនៅកោះJeju និងបុរស ៧៨ឆ្នាំ នៅទីក្រុង Daegu ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap ។
ជាមួយគ្នានេះ អនុរដ្ឋមន្ត្រីសុខាភិបាលកូរ៉េខាងត្បូង Kim Gang-lip ក៏បានបញ្ជាក់ក្នុងសន្និសីទព័ត៌មានមួយថា៖ «យើងសោកស្ដាយចំពោះក្តីកង្វល់ពលរដ្ឋលើការចាក់វ៉ាក់សាំងឥតគិតថ្លៃ ហើយ [ក្រសួង] កំពុងពិនិត្យមើលលើស្ថានការណ៍នេះ»។ អនុរដ្ឋមន្ត្រីសុខាភិបាលកូរ៉េខាងត្បូងរូបនេះ បន្ថែមថាក៏ប៉ុន្តែរដ្ឋាភិបាលក៏ត្រូវស្វែងរកមូលហេតុពិតប្រាកដនៃការស្លាប់ទាំងនេះផងដែរ។
គួរបញ្ជាផងក់ថា វ៉ាក់សាំងផ្ដាសាយរបស់កូរ៉េខាត្បូង ត្រូវបានផលិត ឬចែកចាយដោយក្រុមហ៊ុនឱសថផ្សេងគ្នា រួមមាន ក្រុមហ៊ុន Korea Vaccine, ក្រុមហ៊ុន Boryung Biopharma, ក្រុមហ៊ុន LG Chem និងក្រុមហ៊ុន Shinsung Pharm ៕
ដោយ៖ស តារា
