សារព័ត៌មាន នគរវត្ត តែងតែនាំមុខគេជានិច្ច
អាមេរិក៖ ជាលើកដំបូងនៅទឹកដីអាមេរិក ដែលបណ្តាហាងលក់ទំនិញសំខាន់ៗ ផ្សារទំនើបបានសម្រេចបិទទ្វារ យកក្តារមកបាំងគ្រប់ទីកន្លែង ខ្លាចក្រោយពេលបោះឆ្នោតមានបាតុកម្ម ក្លាយជាហិង្សាវាយប្រហារ ឆក់ប្លន់ យកអីវ៉ាន់នៅក្នុងហាង។
រនាំងការពារហាងលក់ទំនិញនានានៅអាមេរិក គឺយកក្តារមកបាំងពីក្រៅ មិនហ៊ានទុកកញ្ចក់ដូចមុនទៀតឡើយដែលក្រុមបាតុករអាចវាយកម្ទេច ហើយចូលយកអីវ៉ាន់។ ការបោះឆ្នោតអាមេរិកនៅសល់តែមួយថ្ងៃទៀតប៉ុណ្ណោះ នឹងចូលមកដល់ ហើយហាងលក់ទំនិញបានបិទទ្វារតាំងពីពេលនេះទៅ។
មនុស្សជាច្រើនបានព្យាករថា ការបោះឆ្នោតឆ្នាំ២០២០នេះនឹងមានបញ្ហាជាច្រើនកើតឡើងនៅអាមេរិក ហើយអាចនឹងមានមហាបាតុកម្មកើតឡើងផងដែរ ។ ទាំងនោះហើយបានជាបណ្តា ក្រុមហ៊ុន ហាងលក់ទំនិញនានាត្រៀមផែនការរួចជាស្រេច។
កន្លងមក មានបាតុកម្មប្រឆាំងការរើសអើងជាតិសាសន៍នៅអាមេរិក មានផ្សារទំនើប ហាងលក់ទំនិញជាច្រើន ត្រូវខាតបង់ដោយសារតែក្រុមបាតុករវាយប្រហារចូលហាងលក់ទំនិញ យកអីវ៉ាន់តាមចិត្ត។ ទាំងនោះហើយទើបពលរដ្ឋអាមេរិកត្រៀមទុកជាមុន ខ្លាចមានករណីបែបនេះកើតឡើង៕
ដោយ៖ធី រីណា
