សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ភ្នំពេញ៖ នៅរសៀលថ្ងៃទី១៨ វិច្ឆិកា ឆ្នាំ២០២០នេះ សមត្ថកិច្ចបានបញ្ជូន បុរសម្នាក់ ក្នុងចំណោមគ្នាគេ២នាក់ ដែលបានបំផ្លាញរូបសំណាកនៅលើភ្នំប្រសិទ្ធ ក្នុងបរិវេណវត្តភ្នំប្រសិទ្ធត្រៃត្រឹង្សកាល ទៅតុលាការ។ នេះជាករណីធ្វើឲ្យខូចខាតបូជនីយដ្ឋានសាសនា។ បើតាមអធិការស្រុកពញាឮ លោក ដួង តេងសង្ស័យថា ជនសង្ស័យមានស្មារតីមិននឹងនរ បន្ទាប់ពីមានជម្លោះជាមួយប្រពន្ធ។ ដោយឡែកម្នាក់ទៀតមិនពាក់ព័ន្ធក្នុងបទល្មើសនេះ។
លោក អធិការ ដួង តេង បានថ្លែងប្រាប់អ្នកសារព័ត៌មាន ក្នុងស្រុកថា៖ ជនបង្កហេតុឈ្មោះ គង់ សំណាង បានជួលឡានដើម្បីឡើងលើភ្នំប្រសិទ្ធកាលពីថ្ងៃទី១៧ វិច្ឆិកានេះ។ ជនសង្ស័យទំនងជា មានស្មារតីមិននឹងនរ ព្រោះជនបង្កហេតុមានបញ្ហាជាប្រពន្ធនិងមានក្លិនស្រាជាប់ខ្លួន ស្រវឹងរហូត។ លោកបន្តថា៖
«គាត់អាចមានបញ្ហាខួរក្បាល ប៉ុន្តែយើងមិនមានលិខិតបញ្ជាក់ពីពេទ្យអីទេ គ្រាន់តែសន្និដ្ឋានប៉ុណ្ណោញ។ ព្រោះពេលជិះតាក់ស៊ីហ្នឹង គឺបានឈ្លោះគា្នមួយប្រពន្ធ ហើយតាក់ស៊ីអត់ដឹងរឿងអី ក៏ចេះតែដឹកទៅ។ បុរសហ្នឹង គាត់ចង់ទៅអុចធូបលើភ្នំ តាក់ស៊ីក៏ដឹកទៅ ហើយក៏ចូលកន្លែងប្រាសាទហ្នឹង ហើយក៏វាយបំផ្លាញរូបសំណាកនៅកន្លែងនោះតែម្ដង»។ សមត្ថកិច្ចនិងព្រះរាជអាជ្ញាគ្រោងនឹងបញ្ជូន បុរសម្នាក់នេះទៅតុលានៅរសៀលនេះចាត់ការបន្តតាមនីតិវិធី ។
ជាមួយគ្នា ដែរ លោកអធិការបានបញ្ជាក់ថា ៖ នៅកន្លែងកើតហេតុ គឺឃាត់មនុស្ស ២ នាក់ ជនបង្កហេតុ និងម្ចាស់ឡានឈ្នួល ។ ប៉ុន្តែក្រោយពីសាកសួរ ឃើញថាជនបង្ក ហេតុមានតែម្នាក់ទេ ចំណែកម្ចាស់ឡាន ឈ្នួល គឺមិនជាប់ពាក់ព័ន្ធឡើយ។
តាមរបាយការសមត្ថកិច្ច បានបញ្ជាក់អោយដឹងថា៖ រូបសំណាកនិង សម្ភារៈ ដែល រង ការបំផ្លាញ មាន រូបសំណាកព្រះ នាង គ្រប់ល័ក្ខណ៍ , រូបសំណាកព្រះ នាងពៅ , រូបសំណាកកុមារ ពេជ្រ , រូបសំណាក ព្រះអង្គ ចេក , ព្រះ ក្លស្ស ៣, រូបសំណាកព្រះ នាង ទេពប្រណម្យ ៤ និងសម្ភារៈ ក្នុងបរិវេណ វត្ត ជាច្រើនទៀត។
សូមបញ្ជាក់ថា៖ ជនសង្ស័យបើគ្មានសំបុត្រពេទ្យ អាចប្រឈមនិងការផ្តន្ទាទោស ខណៈជាទមិឡឥតសាសនា មកបំផ្លាញរូបសំណាកនិង សម្ភារៈ បូរាណយ៉ាងច្រើននោះ៕
ដោយ៖ សិលា
