ព័ត៌មានបឋម៖ បុរសសង្ហាម្នាក់បានស្លាប់ ដោយត្រូវគ្រាប់កាំភ្លើង ហើយគេមិនទាន់ដឹងថាតើជាករណីធ្វើអត្តឃាតឬករណីឃាតកម្មនោះទេ

ភ្នំពេញ ៖ មានករណីផ្ទុះអាវុធបណ្តាលឱ្យបុរសសង្ហាវ័យ២៦ឆ្នាំម្នាក់បានស្លាប់ពេលបញ្ជូនទៅដល់មន្ទីរពេទ្យ។

ហេតុការណ៍នេះកើតឡើងនៅព្រឹកថ្ងៃទី២២ ខែវិថ្ឆិកា ឆ្នាំ២០២០ តាមបណ្តោយផ្លូវលេខ១៩២៨ ត្រង់ចំណុចផ្សារដើមអម្ពិល សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

តាមប្រភពព័ត៌មានបានប្រាប់ឱ្យដឹងថា ជនរងគ្រោះទើបតែមកពីប្រទេសកូរ៉េបានចំនួនប្រហែលជា២ខែប៉ុណ្ណោះ ដោយមកនៅជាមួយពូរបស់គាត់ដែលជាម្ចាស់ផ្ទះកើតហេតុ  ប៉ុន្តែនៅព្រឹកថ្ងៃទី២២ ខែវិថ្ឆិកា ឆ្នាំ២០២០ ស្រាប់តែជនរងគ្រោះត្រូវគ្រាប់កាំភ្លើងដោយមិនទាន់ដឹងថាជាករណីធ្វើអត្តឃាតឬជាករណីឃាតកម្មនោះទេ។

សូមបញ្ជាក់ថា ពេលនេះយើងមិនទាន់ស្គាល់អត្តសញ្ញាណរបស់ជនរងគ្រោះនៅឡើយនោះទេ ដោយសារសមត្ថកិច្ចកំពុងធ្វើការងារនេះយ៉ាងមមាញឹកបំផុត។

បច្ចុប្បន្នសពបានដឹកពីមន្ទីរពេទ្យយកមកផ្ទះកើតហេតុវិញ ហើយកម្លាំងសមត្ថកិច្ចមូលដ្ឋានរួមជាមួយកម្លាំងនាយកដ្ឋាននៃក្រសួងមហាផ្ទៃកម្រិតធ្ងន់កំពុងស៊ើបរកមូលហេតុនៃការស្លាប់របស់ជនរងគ្រោះ ថាតើជនរងគ្រោះស្លាប់ពាក់ព័ន្ធទៅនឹងករណី ធ្វើអត្តឃាត ឬករណីឃាតកម្ម៕ដោយ៖ រ៉ារ៉ា