សារព័ត៌មាន នគរវត្ត តែងតែនាំមុខគេជានិច្ច
ទីភ្នាក់ងារសេវាកម្មទូទៅ (GSA) បានជូនដំណឹងដល់ប្រធានាធិបតីជាប់ឆ្នោត Joe Bidenថា រដ្ឋបាល Trump បានត្រៀមខ្លួនរួចជាស្រេចដើម្បីចាប់ផ្តើមការផ្លាស់ប្តូរអំណាចជាផ្លូវការ។
សារព័ត៌មានCNN នៅថ្ងៃទី២៤ខែវិច្ឆិកា បានដកស្រង់សម្តីលោកស្រីEmily Murphy ប្រធាន(GSA)ដែលបានឲ្យដឹងថា ក្រុមការងារGSAបានបញ្ជូនលិខិតទៅកាន់ក្រុមការងារផ្ទេរអំណាចរបស់ប្រធានាធិបតីបៃឌិន ស្តីពី ការផ្ទេរអំណាច។
ការសម្រេចខាងលើបានបង្ហាញយ៉ាងច្បាស់ថា រដ្ឋាភិបាលរបស់លោកត្រាំបានយល់ព្រមទទួលស្គាល់ការបរាជ័យរបស់ខ្លួនហើយ ហើយយល់ព្រមផ្ទេរអំណាចឲ្យប្រធានាធិបតីជាប់ឆ្នោតថ្មី។ ការយល់ព្រមផ្ទេរអំណាចនេះកើតឡើងរយៈពេលជាង២០ថ្ងៃចាប់តាំងពីការបោះឆ្នោតមកទល់ពេលនេះ ដោយលោកត្រាំមិនព្រម ទទួលស្គាល់លទ្ធផល ដោយបន្តប្តឹងតវ៉ា តែមិនបានសម្រេច។
នៅក្នុងលិខិត លោកស្រី Emily Murphy ប្រធាន(GSA)បានឲ្យដឹងថា GSAនឹងចាប់ផ្តើមជួយដល់ លោកបៃឌិន ក្នុងការផ្ទេរអំណាច។ លោកស្រីបញ្ជាក់ថា«ខ្ញុំសូមបញ្ចាក់ថាការសម្រេចខាងលើ គឺជាការធ្វើឡើងដោយឯករាជ្យ តាមច្បាប់ និងស្ថានភាពជាក់ស្តែង។ ខ្ញុំមិនដែលរងគំនាបពីភាគីនយោបាយណាមួយឡើយ»។
ការលើកឡើងរបស់លោកស្រីកើតឡើងក្រោយពេលដែលលោកត្រាំប្រកាសកាលពីថ្ងៃទី២៣ខែវិច្ឆិកា ថាលោកចាប់ផ្តើមដំណើរការផ្ទេរអំណាចហើយ។ លោកត្រាំបានបង្ហោះលើបណ្តាញសង្គមថា«ខ្ញុំសូមអរគុណដល់លោកស្រី Emily Murphy ប្រធាន(GSA) ដែលមានភាពស្មោះត្រង់ចំពោះប្រទេសជាតិ។ លោកស្រីរងការរំខាន គំរាមកំហែង វាយប្រហារ… ហើយខ្ញុំមិនចង់ឲ្យមានរឿងនោះកើតឡើងចំពោះលោកស្រី និងបុគ្គលិករបស់ GSA»ឡើយ៕ដោយ៖ធី រីណា
