សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តលឿន ផ្ទុះកង់ខាងមុខបានរេចង្កូត ជ្រុលទៅបុករះចូលរបងផ្ទះប្រជាពលរដ្ឋបណ្តាលឲ្យបាក់អស់ជាច្រើនកង់ សំណាងល្អអ្នកបើករថយន្ត និងអ្នករួមដំណើរមិនមានរងរបួសនោះទេ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅម៉ោង ១និង៥០នាទីរំលងអធ្រាត្រឈានចូលថ្ងៃទី១១ ខែមករា ឆ្នាំ ២០២១ ស្ថិតនៅតាមបណ្តោយផ្លូវ វិមាន ឈ្នះ ឈ្នះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុគាត់បានឃើញបុរសម្នាក់បានបើករថយន្តម៉ាកតូយ៉ូតា ស៊ីណា ពណ៌សពាក់ស្លាកលេខ ភ្នំពេញ 2BF-6341 ធ្វើដំណើរតាមបណ្តោយផ្លូវ វិមាន ឈ្នះ ឈ្នះ ក្នុងទិសដៅពីជើងមកត្បូងយ៉ាងលឿន ខណៈពេលមកដល់ផ្លូវកោងស្រាប់តែផ្ទុះកង់មុខរេចង្កូតជ្រុលទៅបុករះចូលរបងផ្ទះប្រជាពលរដ្ឋ បាក់អស់ជាច្រើនកង់។ សំណាងល្អក្នុងករណីគ្រោះថ្នាក់ចរាចរណ៍នេះ មិនបណ្តាលឲ្យមានអ្នករងរបួសនោះទេ ចំណែករថយន្តខូចខាតផ្នែកខាងមុខស្ទើរទាំងស្រុង។
បន្ទាប់ពីកើតហេតុសមត្ថកិច្ចមូលដ្ឋាន សហការជាមួយសមត្ថកិច្ចជំនាញចរាចរណ៍ចុះមកស្ទូចយករថយន្តទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នានៅពេលក្រោយ៕ជ្រោយពេជ្រ
