សារព័ត៌មាន នគរវត្ត តែងតែនាំមុខគេជានិច្ច
សារព័ត៌មានជាតិកូរ៉េខាងជើង KCN បានផ្សាយនៅថ្ងៃទី១៥ខែមករាថា ប្រទេសនេះបានដង្ហែក្បួនព្យុហយាត្រាអបអរមហាសន្និបាតបក្សលើកទី៨ដោយជោគជ័យ។
ក្រុមអ្នកឯកទេសបានឲ្យដឹងថា អាវុធនៅក្នុងពិធីដង្ហែក្បួននោះ មានទាំងកាំជ្រួចមីស៊ីលឆ្លងទ្វីបបាញ់ចេញពីនាវាមុជទឹក(SLBM) ។ ទីបញ្ជាការកម្លាំងទាហានអាមេរិកប្រចាំនៅកូរ៉េខាងត្បូងបានឲ្យដឹងថា ខ្លួនកំពុងតែវិភាគទៅលើអាវុធដែលកូរ៉េខាងជើងបង្ហាញនៅក្នុងពិធីដង្ហែក្បួនព្យុហយាត្រា ។
កន្លងមក នៅក្នុងមហាសន្និបាតបក្ស មេដឹកនាំគីម ជុងអ៊ុន បានសន្យាបង្កើនសមត្ថភាពអាវុធបរមាណូ កាំជ្រួចមីស៊ីលជាការកសាងកម្លាំងទាហានកូរ៉េខាងជើងឱ្យខ្លាំងបំផុត អាចទប់ទល់រាល់ការវាយប្រហារពីសត្រូវ ។
តាមរូបភាពដែលកូរ៉េខាងជើងបានផ្សព្វផ្សាយពីពិធីដង្ហែក្បួនបានបញ្ចប់ដោយក្បួនរថយន្តដឹកកាំជ្រួចមីស៊ីលរយៈចម្ងាយខ្លីបាញ់ចេញពីនាវាមុជទឹក ។
សារព័ត៌មានកូរ៉េខាងជើង បានផ្សាយថា ប្រទេសនេះមានអាវុធទំនើបបំផុតលើពិភពលោក ក្នុងនោះមានមីស៊ីលបាញ់ចេញពីនាវាមុជទឹកផងដែរ។
ពិធីដង្ហែក្បួនព្យុហយាត្រា បានធ្វើឡើងនៅយប់ថ្ងៃទី១៤ខែមករា ប៉ុន្តែកូរ៉េខាងជើងមិនបានបង្ហាញកាំជ្រួចមីស៊ីលដែលអាចបំពាក់ក្បាលគ្រាប់បរមាណូនោះឡើយ។
មហាសន្និបាតបក្សកូរ៉េខាងជើង បានធ្វើក្នុងរយៈពេល៨ថ្ងៃ ហើយមេដឹកនាំកូរ៉េខាងជើងបានបង្កើនសកម្មភាពបរមាណូដើម្បីការពារប្រទេសជាតិ ។ការបង្កើនកម្លាំងក៏ជាសាររបស់លោកគីម ជុងអ៊ុនផ្ញើទៅកាន់មេដឹកនាំថ្មីអាមេរិក លោកបៃឌិនផងដែរ៕
ដោយ៖ធី រីណា(រូបភាព៖ KCNA)
