សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បន្ទាប់ពីទំនាក់ទំនងទ្វេភាគីរវាងចិន និងអាមេរិក បានរងផលប៉ះពាល់ខ្លាំងក្រោមអាណត្តិ៤ឆ្នាំ របស់អតីតប្រធានាធិបតីអាមេរិកលោក ដូណាល់ ត្រាំ។ ពេលនេះលោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន បានស្នើឲ្យរដ្ឋបាលអាមេរិករបស់លោកប្រធានាធិបតី ចូ បៃឌិន ធ្វើការជាមួយប៉េកាំងក្នុងការបើកឡើងវិញនូវការសន្ទនា ដើម្បីស្រោចស្រង់ទំនាក់ទំនងរវាងប្រទេសទាំងពីរ។
ជាថ្មីម្ដងទៀត ដើម្បីជួសជុលទំនាក់ទំនងដែលបែកបាក់បួនឆ្នាំមកនេះ ប្រមុខការបរទេសចិនលោក វ៉ាង យី នៅថ្ងៃទី២១ ខែកុម្ភៈ ឆ្នាំ២០២១ បាននិយាយប្រាប់ឲ្យអាមេរិក ចាប់ផ្ដើមកិច្ចសន្ទនាទ្វេភាគីឡើងវិញ។ លោក វ៉ាង យី បន្តថា សកម្មភាពរបស់អតីតរដ្ឋបាលលោក ដូណាល់ ត្រាំ ដែលបានគាបសង្កត់ និងរារាំងចិនលើឆាកអន្តរជាតិ បានបង្កើតផលប៉ះពាល់មួយដែលមិនអាចប៉ាន់ស្មានបាន។
ជាក់ស្ដែងក្នុងន័យនេះ ប្រមុខការបរទេសចិនរូបនេះ ក៏ទាមទារឱ្យអាមេរិកលុបចោលពន្ធលើទំនិញរបស់ចិន ក៏ដូចជាបញ្ឈប់ការគាបសង្កត់លើវិស័យបច្ចេកវិទ្យារបស់ចិនផងដែរ។ ថ្លែងទៅកាន់វេទិកាមួយនៅទីក្រុងប៉េកាំង លោក វ៉ាង ក៏និយាយដល់បញ្ហាផ្ទៃក្នុងរបស់ចិន ដោយលោកទទូចឱ្យអាមេរិកគោរពប្រយោជន៍ស្នូលរបស់ចិន ឈប់ជ្រៀតជ្រែកក្នុងកិច្ចការផ្ទៃក្នុង និងឈប់ពាក់ព័ន្ធជាមួយកោះតៃវ៉ាន់ដែលព្យាយាមផ្តាច់ខ្លួនពីចិននិងប្រកាសឯករាជ្យ។
បេីតាមសុន្ទរកថារបស់លោក វ៉ាង យី មុនអះអាងថា ចិនត្រៀមខ្លួនរួចជាស្រេចក្នុងការប្រាស្រ័យទាក់ទងជាមួយអាមេរិក និងព្យាយាមដោះស្រាយបញ្ហាទាំងឡាយនោះ ក៏បានគូសបញ្ជាក់ថា៖«ក្នុងរយៈពេលប៉ុន្មានឆ្នាំនេះ អាមេរិកផ្តាច់ទំនាក់ទំនងទ្វេភាគីគ្រប់កម្រិតជាមួយចិន»។
សូមជម្រាបថា កាលពីថ្ងៃទី១១ ខែកុម្ភៈ កន្លងទៅថ្មីៗនេះ ប្រធានាធិបតិចិនលោក ស៊ី ជិនភីង និងលោក ចូ បៃឌិន ប្រធានាធិបតីអាមេរិក បានជួបជជែកគ្នាតាមរយៈទូរស័ព្ទ ដោយភាគីទាំងពីរសុទ្ធតែបង្ហាញក្ដីបារម្ភទៅវិញទៅមក។ ចំពោះការសន្ទនានេះ លោក វ៉ាង យី បានចាត់ទុកថា ជាជំហានវិជ្ជមានមួយ។
ដោយឡែកចំពោះការលើកឡើងរបស់លោកវ៉ាង យី នៅថ្ងៃទី២២ ខែកុម្ភៈនេះ ធ្វើឡើងក្នុងបិរបទមួយដែលទំនាក់ទំនងអាមេរិក និងចិនដុនដាបខ្លាំងមិនធ្លាប់មាន។ ទីក្រុងវ៉ាស៊ីនតោន និងក្រុងប៉េកាំងប៉ះទង្គិចគ្នាលើបញ្ហាជាច្រើនដូចជា៖ ពាណិជ្ជកម្ម ការចោទប្រកាន់រឿងរំលោភសិទ្ធិជនជាតិភាគតិចវីហ្គ័រនៅតំបន់ស៊ីនជាំង បញ្ហាហុងកុង និងជម្លោះគ្រប់គ្រងសមុទ្រចិនភាគខាងត្បូង។
ចំណែករដ្ឋបាលលោកបៃឌិន កាលពីកន្លងទៅ ក៏បានបង្ហើបថា នឹងបន្តដាក់សម្ពាធលើចិន ក៏ដូចជាសសើរគោលនយោបាយរបស់លោក ដូណាល់ ត្រាំ ទៅលើចិនផងដែរ។ ជាក់ស្តែង លោក ចូ បៃឌិន បានបង្ហាញក្តីបារម្ភចំពោះការធ្វើពាណិជ្ជកម្មបែបគំរាម និងមិនស្មើភាពរបស់ចិន។ ហេតុនេះហើយលោកស្រីJanet Yellen រដ្ឋមន្ត្រីក្រសួងរតនាគារអាមេរិក បានបញ្ជាក់ពីការអនុវត្តគោលនយោបាយពាណិជ្ជកម្មដាក់ពន្ធលើទំនិញចិន ដែលដាក់ចេញដោយអតីតប្រធានាធិបតី ដូណាល់ ត្រាំ មួយរយៈទៀតសិន។
គួរបញ្ជាក់ថា នៅថ្ងៃដដែលនោះ ឯកអគ្គរដ្ឋទូតចិនប្រចាំអាមេរិក លោក Cui Tiankai បាននិយាយថា ប្រទេសទាំងពីរចាំបាច់ត្រូវកំណត់ឲ្យបានច្បាស់ពីដែនកំណត់នៃគោលនយោបាយការបរទេសរៀងៗខ្លួន និងយល់ពីគោលបំណងយុទ្ធសាស្ត្ររបស់គ្នាទៅវិញទៅមក។ អ្នកការទូតចិនរូបនេះ និយាយបន្ថែមថា បញ្ហាតៃវ៉ាន់ ស៊ីជាំង និងទីបេសុទ្ធសឹងតែជាបន្ទាត់ក្រហមសម្រាប់ចិន ដែលអាមេរិកមិនត្រូវឆ្លងកាត់ជាដាច់ខាត៕ដោយ៖ស តារា
រូបភាព៖លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន
