សិស្សសាលា៣នាក់បានស្លាប់ភ្លាមៗនៅនឹងកន្លែងកើតហេតុតែម្តងដោយគ្រោះថ្នាក់ចរាចរណ៍

ខេត្តព្រះសីហនុ៖ យោងតាមរបាយការណ៍បឋមពីសមត្ថកិច្ចបានអោយឲ្យដឹងថា នៅវេលាម៉ោង៩និង០០នាទីព្រឹកថ្ងៃ៤ ខែមីនា ឆ្នាំ២០២១ មានគ្រោះថ្នាក់ចរាចរណ៍រវាងរថយន្តជាមួយម៉ូតូ បណ្តាលឲ្យភាគីខាងម៉ូតូដែលសមត្ថកិច្ចបញ្ជាក់ថាជាក្មេងប្រុសៗសិស្សសាលាចំនួន៣នាក់បានស្លាប់នៅនឹងកន្លែងកើតហេតុ។

ហេតុការណ៍កើតឡើងលើផ្លូវជាតិលេខ៤ ចន្លោះបង្គោលគីឡូម៉ែត្រលេខ ១៨២-១៨៣ ម្តុំមុខសាលាបឋមសិក្សា .អនុវិទ្យាល័យសំរុង ឃុំសំរុង ស្រុកព្រៃនប់ ខេត្តព្រះសីហនុ ។

ក្រោយកើតហេតុសមត្ថកិច្ចបានចុះអន្តរាគមន៍ ស្រាវជ្រាវរកឈ្មោះជនរងគ្រោះនិងគ្រួសារ , សម្រួលចរាចរណ៍និងដោះស្រាយតាមនីតិវិធីច្បាប់។

របាយការណ៍បឋមពីសមត្ថកិច្ចបញ្ជាក់ថា ភាគីខាងម៉ូតូមួយគ្រឿងម៉ាក HONDA-SCOPPY  ពណ៌ស គ្មានស្លាកលេខ ជិះឌុបគ្នា៣នាក់ មានទិសដៅ(ភ្នំពេញ-ខេត្តព្រះសីហនុ) មកដល់ចំណុចកើតហេតុ អ្នកបើកម៉ូតូ បើកជ្រុលចូលមកចំណែកផ្លូវម្ខាងទៀត រួចក៏បុកនឹងរថយន្ត មួយគ្រឿងម៉ាក SSANGYONG ពណ៌សំបកឪឡឹក ពាក់ស្លាក លេខភ្នំពេញ 2AQ-8400 មានទិសដៅផ្ទុយគ្នា (អ្នកបើកបរមិនទាន់ស្គាល់អត្តសញ្ញាណ ចុះគេចខ្លួនក្រោយពេលកើតហេតុ) បច្ចុប្បន្នសមត្ថកិច្ចបានយករថយន្តនិងម៉ូតូទៅរក្សាទុកនៅអធិការដ្ឋាននគរបាលស្រុករង់ចាំដោះស្រាយនៅពេលក្រោយ ៕

ដោយ៖ឆ្លាម សមុទ្រ