សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ នៅក្នុងបទសម្ភាសន៍ជាមួយទីភ្នាក់ងារព័ត៌មាន AP រដ្ឋមន្ត្រីទទួលបន្ទុកកិច្ចការវ៉ាក់សាំងនៃចក្រភពអង់គ្លេស លោក ណាដហ៊ីម ហ្សាហាវី (Nadhim Zahawi) នៅថ្ងៃសុក្សទី០៥ ខែមីនា ឆ្នាំ២០២១ បានច្រានចោល ការលើកឡើងដែលថាប្រទេសរបស់លោកកំពុងដណ្ដើមវ៉ាក់សាំង COVID-19 ពីបណ្ដាប្រទេសក្រីក្រ ដោយទទូចថាវ៉ាក់សាំង១០លានដូសមកពីប្រទេសឥណ្ឌានឹង ត្រូវចែកចាយនៅក្នុងចក្រភពអង់គ្លេស។
បើតាមសារព័ត៌មាន CNA នៅថ្ងៃសៅរ៍ ទី០៦ ខែមីនា ឆ្នាំ២០២១ បានដកស្រង់សម្តីរបស់រដ្ឋមន្ត្រីទទួលបន្ទុកកិច្ចការវ៉ាក់សាំងរូបនេះ ថ្លែងប្រាប់ទីភ្នាក់ងារព័ត៌មាន AP ថា៖ លោក បានទទួលស្គាល់ថាវិទ្យាស្ថាន Serum របស់ឥណ្ឌា ដែលត្រូវបានចាត់ទុកថាជាអ្នកផលិត វ៉ាក់សាំងធំជាងគេបំផុតនៅលើពិភពលោក នឹងបញ្ជូនវ៉ាក់សាំង COVID-19 អភិវឌ្ឍឡើងដោយសាកលវិទ្យាល័យ Oxford និងក្រុមហ៊ុន AstraZeneca មកកាន់ចក្រភពអង់គ្លេស។
ដោយឡែកអង្គការក្រៅរដ្ឋាភិបាលមួយចំនួនដូចជា៖ អង្គការគ្រូពេទ្យគ្មានព្រំដែន (Medecins Sans Frontieres) បានបង្ហាញការព្រួយបារម្ភថា ការបញ្ជូនវ៉ាក់សាំងពីឥណ្ឌា ទៅអង់គ្លេសដោយវិទ្យាស្ថាន Serum នឹងធ្វើឱ្យប៉ះពាល់ ឬកាត់បន្ថយការផ្គត់ផ្គង់វ៉ាក់សាំងសម្រាប់បណ្ដាប្រទេសកំពុងអភិវឌ្ឍ។ ក៏ប៉ុន្តែ លោក Zahawi បានច្រានចោលការព្រួយបារម្ភនេះ។
ក្នុងបទសម្ភាសន៍ជាមួយទីភ្នាក់ងារព័ត៌មាន AP លោក ណាដហ៊ីម ហ្សាហាវី បានបញ្ជាក់ដូច្នេះថា៖ «ជាការពិត យើងអាចធានាបានថាវ៉ាក់សាំងដែល យើងទទួលបានពីក្រុមហ៊ុន AstraZeneca និងវិទ្យាស្ថាន Serum នឹងប៉ះពាល់ដល់ប្ដេជ្ញាចិត្តរបស់យើងចំពោះបណ្ដាប្រទេសក្រីក្រ និងប្រទេសមានប្រាក់ចំណូលមធ្យម នោះទេ»។
ទាក់ទិននឹងបញ្ហានេះដែរ នាយករដ្ឋមន្ត្រីអង់គ្លេស លោក បូរីស ចនសុន កន្លងមកបានសន្យាថា នឹងបរិច្ចាគវ៉ាក់សាំងដែលនៅសល់ដល់បណ្ដាប្រទេសដទៃ តែលោកមិនទាន់បាន កំណត់ពេលវេលាឡើយ។
គួរបញ្ជាក់ថា ចក្រភពអង់គ្លេសទទួលបានសិទ្ធិទិញវ៉ាក់សាំង ៤៥៧លានដូស ពីក្រុមហ៊ុនជាច្រើនដែលនេះជាចំនួនច្រើនជាង៣ដង ដែលចាំបាច់សម្រាប់ចាក់ជូន ប្រជាជនរបស់ខ្លួន៕ដោយ៖ស តារា
រដ្ឋមន្ត្រីទទួលបន្ទុកកិច្ចការវ៉ាក់សាំងនៃចក្រភពអង់គ្លេស លោក ណាដហ៊ីម ហ្សាហាវី (Nadhim Zahawi)
រូបថត៖The politics sketch
