សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុទ្ធនាការចាក់វ៉ាក់សាំង ១ខែឲ្យបាន ១លាននាក់របស់កម្ពុជា កំពុងតែធ្វើឡើងយ៉ាងសស្រាក់សស្រាំ ស្របពេល ព្រឹត្តិការណ៍កូវីដ-១៩ សហគមន៍២០កុម្ភៈ កំពុងបន្តរាលដាល។
ប្រជាពលរដ្ឋ ពិសេសអ្នកនៅភ្នំពេញ និងខេត្តកណ្ដាល មន្ត្រីរាជការគ្រប់ជាន់ថ្នាក់ កងកម្លាំងប៉ូលិសទាហាន បានទទួលការចាក់វ៉ាក់សាំងជាបន្តបន្ទាប់ នៅទីតាំងផ្សេងគ្នាជាច្រើនកន្លែង។ ក្នុងនោះក្រសួងដែនដី នគរូបនីយកម្ម និងសំណង់ក៏បានរៀបចំចាក់ជូនដល់ថ្នាក់ដឹកនាំ មន្ត្រី និងបុគ្គលិករបស់ខ្លួនផងដែរ។
ក្រោមការគិតគូរពីលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី គឺលោកបានអនុញ្ញាតបញ្ចូលបុគ្គលិកថែទាំសួន និងអនាម័យឱ្យទទួលបានវ៉ាក់សាំងបង្ការមេរោគកូវីដ-១៩ ដែលគំរូដឹកនាំដ៏ល្អនេះបានទទួលការសរសើរដោយផ្ទាល់មាត់ពីប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន។
សូមជម្រាបថា, សម្តេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី៣១ ខែមីនា ឆ្នាំ២០២១ បានមានប្រសាសន៍ក្រើនរំលឹក សូមអោយបងប្អូនជនរួមជាតិ ទៅទទួលវ៉ាក់សាំង អោយបានគ្រប់គ្នា ក្នុងយុទ្ធនាការនៃការចាក់វ៉ាក់សាំងការពារជំងឺកូវីដ-១៩ ដែលនឹងធ្វើឡើងលក្ខណ:ទ្រង់ទ្រាយធំ។
សម្តេចតេជោ ហ៊ុនសែន បានថ្លែងបញ្ជាក់ថា, តាមគម្រោងក្នុងរយះពេល១ខែត្រូវចាក់ជូនប្រជាពលរដ្ឋក្នុងកំរិត១លានដូស ទាំងការទិញ និងការទទួលជំនួយនឹងមកដល់ជាបន្តរបន្ទាប់។ វ៉ាក់សាំងគឺត្រូវបញ្ជូនទៅចាក់ជូនប្រជាពលរដ្ឋតាមបណ្តាខេត្តក្រុង ទូទាំងប្រទេសកម្ពុជា។
សម្តេចសូមបងប្អូនជនរួមជាតិអនុវត្តតាមវិធានសុខាភិបាលអោយបានម៉ត់ចត់ និងបន្តចូលរួមជាមួយវិធានការ «៣ការពារ ៣កុំ» ឱ្យបានម៉ឺងម៉ាត់ជាទីបំផុត៕
ដោយ ៖ សិលា
