សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ នៅយប់ថ្ងៃទី០៨ ខែមេសា ឆ្នាំ២០២១ លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម អញ្ជើញដឹកនាំបញ្ជាដោយផ្ទាល់ ដេីម្បីបញ្ចៀសការកកស្ទះចរាចរណ៍នៅចំណុចរង្វង់មូលស្ពានគីហ្សូណា ស្ថិតក្នុងក្រុងកំពង់ចាម ខេត្តកំពង់ចាម ។
សូមបញ្ជាក់ផងដែរថា នៅវេលាម៉ោង ៨និង៣០នាទីយប់ ដោយមានការកកស្ទះចរាចរណ៍ ដែលបណ្ដាលមកពីបងប្អូនសាធារណជនមួយចំនួនមិនទាន់យល់បានច្បាស់ នូវវិធានការអនុវត្ដតាមសេចក្ដីសម្រេច លេខ៤៤ សសរ របស់រាជរដ្ឋាភិបាល ស្ដីពីការហាមឃាត់ការធ្វេីដំណេីរ និងការបិទរមណីយដ្ឋាន ទេសចរណ៍ នៅទូទាំងប្រទេស ជាបណ្ដោះអាសន្ន រយៈពេល១៤ថ្ងៃ ដេីម្បីទប់ស្កាត់ការឆ្លងរាលដាលជំងឺកូវីដ-១៩ ។
លោកឧត្តមសេនីយ៍ស្នងការ ក៏បានធ្វេីការអប់រំណែនាំ និងផ្សព្វផ្សាយនូវសេចក្ដីសម្រេចរបស់រាជរដ្ឋាភិបាលលេខ៤៤ សសរ ដល់បងប្អូនសាធារណជនដែលបានធ្វេីដំណេីរឆ្លងកាត់ពីខេត្តមួយទៅខេត្តមួយទៀត ឲ្យបានយល់ច្បាស់ចំពោះវិធានការរបស់រាជរដ្ឋាភិបាល ក្នុងគោលបំណង ទប់ស្កាត់ ការឆ្លងរីករាលដាល ជំងឺកូវីដ-១៩ ដែលបាននឹងកំពុងរីករាលដាលក្នុងប្រទេសកម្ពុជា ដែលតម្រូវឲ្យប្រជាជនទាំងអស់គ្នា ចូលរួមអនុវត្តក្នុងវិធានការដែលបានដាក់ចេញដោយរាជរដ្ឋាភិបាលកម្ពុជា ។
បន្ទាប់មកលោកឧត្តមសេនីយ៍ស្នងការ ក៏បានបន្ដធ្វេីដំណេីរចុះត្រួតពិនិត្យគោលដៅចំនួន០២ផ្សេងទៀត ដែលនៅក្នុងស្រុកបាធាយ ៕
ដោយ៖ សូរិយា
