សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អាជ្ញាធររាជធានីភ្នំពេញបាននិងកំពុងរៀបចំវិទ្យាល័យជា ស៊ីម សាមគ្គី ឱ្យទៅជាកន្លែងសម្រាប់ព្យាបាលអ្នកជំងឺកូវីដ-១៩ ហើយមួុយផ្នែកទៀតយកធ្វើជាកន្លែងសម្រាប់ធ្វើចត្តាឡីស័កផងដែរ ខណៈជំងឺនេះមិនបានធូរស្រាលនៅឡើយទេ តែបានបន្ថែមអ្នកជំងឺកាន់តែច្រើនថែមទៀត ដែលនៅតាមមន្ទីរពេទ្យនានារបស់រដ្ឋមិនអាចទទួលអ្នកជំងឺអស់ ។
វិទ្យាល័យជាស៊ីមសាមគ្គី ស្ថិតនៅតាមបណ្តោយផ្លូវលេខ២៧១ ក្នុងសង្កាត់បឹងសាឡាង ខណ្ឌទួលគោក។
នៅព្រឹកថ្ងៃទី០៩ ខែមេសា ឆ្នាំ២០២១ លោកឃួង ស្រេង អភិបាលរាជធានីភ្នំពេញបានដឹកនាំអាជ្ញាធរនិងមន្ត្រីមន្ទីរសុខាភិបាល ចុះពិនិត្យទីតាំងវិទ្យាល័យជាស៊ីមសាមគ្គីខាងលើ ដើម្បីទុកជាកន្លែងសម្រាប់ព្យាបាលអ្នកជំងឺកូវីដ-១៩ ឱ្យបានសមរម្យ ហើយអគារមួយផ្នែកទៀតនៃវិទ្យាល័យនេះ ក៏ត្រូវរៀបចំជាកន្លែងសម្រាប់ធ្វើចត្តាឡីស័កផងដែរ ។
ក្នុងឱកាសនៃការចុះពិនិត្យស្ថានភាពនៃការរៀបចំទីតាំងខាងលើនេះ លោកឃួង ស្រេង បានបញ្ជាក់ថា៖ ទីតាំងខាងលើនេះ ត្រូវរៀបចំគ្រែចំនួន២០០គ្រែ សម្រាប់អ្នកជំងឺ និង១០គ្រែទៀតសំរាប់ក្រុមគ្រូពេទ្យដែលត្រូវព្យាបាលអ្នកជំងឺកូវីដ-១៩ ។
វិទ្យាល័យជា ស៊ីម សាមគ្គី ក្រោមការបញ្ជាផ្ទាល់ពីលោកឃួង ស្រេង ក្រុមការងារចម្រុះដែលមានទាំងអាជ្ញាធរខណ្ឌទួលគោក ប៉ូលិសមូលដ្ឋាន មន្ត្រីអគ្គិសនី មន្ទីរសុខាភិបាលបានដុតដៃដុតជើងយ៉ាងមមាញឹកក្នុងការរៀបចំទៅតាមតួនាទីរបស់ខ្លួនដើម្បីធ្វើយ៉ាងណាឱ្យទីតាំងមួយនេះក្លាយជាកន្លែងដែលមានភាពសមរម្យនិងមានអនាម័យ បរិស្ថានល្អប្រសើរ ក្នុងការព្យាបាលអ្នកជំងឺកូវីដ-១៩ ខណៈដែលជំងឺនេះ មិនត្រឹមតែមិនបានធូរស្រាលនោះទេ តែបានបន្ថែមអ្នកជំងឺកាន់តែច្រើនឡើង ដែលបានធ្វើឱ្យមន្ទីរពេទ្យនានារបស់រដ្ឋមិនអាចទទួលអ្នកជំងឺអស់៕
ដោយ៖សំរិត
