សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចបានអោយដឹងថា, មន្ដ្រីយោធាដែលត្រូវចាប់ខ្លួន ពេលជិះបុកបារាសសមត្ថកិច្ច ជាមនុស្សមានបញ្ហាខួរក្បាល ព្រោះធ្លាប់គ្រោះថ្នាក់ចរាចរណ៍ស្លាប់សមាជិកគ្រួសារ និងកូន, ប្រពន្ធក៏កើតជំងឺផ្លូវចិត្ត និងបានលែងលះគ្នា, ដូច្នេះការប្រព្រឹត្តខាងលើអាចប៉ះពាល់ប្រព័ន្ធសរសៃប្រសាទ ទាំងមិនដឹងខ្លួនពីសកម្មភាពជាបទល្មើសព្រហ្មទណ្ឌ។
បើយោងតាមលិខិតរបស់មន្ទីរពេទ្យកាល់ម៉ែត និងមន្ទីរព្រះកុសុមៈ បានបង្ហាញថា មន្ដ្រីយោធាឈ្មោះ ខៀវ ចាន់សុភក្រ្ដា ជាមនុស្សមានបញ្ហាខួរក្បាល និងជំងឺផ្លូវចិត្តប្រាកដមែន ហើយតម្រូវឲ្យលេបថ្នាំជាប់រៀងរាល់ថ្ងៃ។
តាមប្រវត្តិនៃបុគ្គលនេះ ! មូលហេតុដែលបុគ្គលរូបនេះ មានបញ្ហាខួរក្បាល និងជំងឺផ្លូវចិត្ត ដោយសារតែអំឡុងឆ្នាំ២០១៦ បានជួបគ្រោះថ្នាក់ចរាចរណ៍ក្រឡាប់រថយន្ដ នៅផ្លូវជាតិលេខ៤៨ ក្នុងខេត្តកោះកុង បណ្ដាលឲ្យស្លាប់គ្រួសារ ប្អូនថ្លៃ២នាក់ និងមានកូនក្នុងពោះប្រពន្ធ។ ក្រោយមកបុគ្គលរូបនេះ បានលែងលះគ្នាជាមួយប្រពន្ធ ហើយប្រពន្ធក៏មានបញ្ហាសតិដូចគ្នានេះដែរ។
ដោយឡែកនៅព្រឹកថ្ងៃទី២០ ខែមេសា ឆ្នាំ២០២១នេះ នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ពាក់ព័ន្ធករណីនេះ លោកបានប្រាប់បណ្ដាញសារព័ត៌មាន លោកមិនទាន់សម្រេចយ៉ាងណានោះទេ ពោលទុកឲ្យស្ថាប័នតុលាការជាអ្នកសម្រេចតាមផ្លូវច្បាប់ ក្រោយពេលសមត្ថកិច្ចបញ្ជូនទៅកាន់តុលាការ។
នៅព្រឹកថ្ងៃទី២០ ខែមេសា ឆ្នាំ២០២១នេះកម្លាំងនគរបាលខណ្ឌជ្រោយចង្វា បានចាប់ឃាត់វាយខ្នោះមន្រ្តីយោធារូបនេះ ក្រោយបើកម៉ូតូបុកបារាសបិទខ្ទប់ និងប្រើហិង្សាទៅលើសមត្ថកិច្ចប្រចាំគោលដៅទៀតផង។ សម្រាប់ជនសង្ស័យដែលជាមន្រ្តីយោធារូបនេះ នឹងត្រូវចាប់ឃាត់បញ្ជូនទៅកាន់តុលាការចាត់ការតាមច្បាប់។
ជនបង្ករូបនេះមានឈ្មោះ ខៀវ ចាន់សុភក្ត្រា អាយុ៣១ឆ្នាំ ជាមន្រ្តីយោធាក្រសួងការពារជាតិ។
សមត្ថកិច្ចបានបញ្ជាក់ថា ជនបង្កបានបើកម៉ូតូបុកបារាសបិទខ្ទប់ ជេរប្រមាថមើលងាយ និងវាយបង្ករបួសស្នាមមកលើសមត្ថកិច្ចទៀតផង។ ពេលនេះសមត្ថកិច្ចកំពុងតែនាំខ្លួនមកអធិការខណ្ឌដើម្បីសាកសួរ និងរៀបចំសំណុំឯកសារបញ្ជូនទៅសាលាដំបូង រាជធានីភ្នំពេញ។
ដោយឡែក ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ក៏បានឧបត្ថម្ភជាថវិកាដល់កម្លាំងក្នុងកិច្ចប្រតិបត្តិការចាប់ខ្លួនជនសង្ស័យដែលប្រព្រឹត្តិបទល្មើសហិង្សា នៅគោលដៅរង្វង់មូលព្រហ្មមុខបួន សង្កាត់ជ្រោយចង្វាខណ្ឌជ្រោយចង្វាផងដែរ។
សូមបញ្ជាក់ថា,តាមរយៈប្រតិបត្តិការ បំពេញការងាររបស់កងកម្លាំងអនុវត្តច្បាប់ លោកឧត្តមសេនីយ៍ឯក ស ថេត ក៏បានឧបត្ថម្ភថវិកាផ្ទាល់ខ្លួនជូនដល់មន្រ្តីចំនួន០៤រូប៖
ទី១-លោកអនុសេនីយ៍ឯក វែង រីណា នាយផ្នែកអត្តសញ្ញាណកម្ម នៃអធិការដ្ឋាននគរបាលខណ្ឌជ្រោយចង្វា (ជនរងគ្រោះ) ចំនួន១លានរៀល
ទី២-លោកអនុសេនីយ៍ឯក កែវ សុខជា មន្រ្តីអន្តរាគមន៍ នៃអធិការដ្ឋាននគរបាលខណ្ឌជ្រោយចង្វាចំនួន៥០ម៉ឺនរៀល
ទី៣-លោកអនុសេនីយ៍ឯក លីន លី មន្រ្តីការិយាល័យចរាចរណ៍ផ្លូវគោកចំនួន ៥០ម៉ឺនរៀល
ទី៤-លោក ឯល សុភ័ក្រ្ត មន្រ្តីកិច្ចសន្យា ចំនួន៥០ម៉ឺនរៀល។
ក្នុងនោះ លោកអភិបាល នៃគណៈអភិបាលខណ្ឌជ្រោយចង្វាក៏បានឧបត្តម្ភថវិកាចំនួន១លានរៀលដល់ លោកអនុសេនីយ៍ឯក វែង រីណា ដែលជាជនរងគ្រោះផងដែរ។
សូមជម្រាបជូនផងដែរ, ទោះបីជាមន្ត្រីយោធាខាងលើនេះ មានបញ្ហាខួរក្បាល រហូតដល់មានលិខិតបញ្ជាក់ពីគ្រូពេទ្យយ៉ាងណាក៏ដោយក្នុងការអនុវត្តតួនាទីភារកិច្ច សមត្ថកិច្ចដែលជាអ្នកអនុវត្តច្បាប់ ត្រូវតែធ្វើការឃាត់ខ្លួនជនសង្ស័យក្នុងបទល្មើសជាក់ស្ដែង ដើម្បីសាកសួរ និងកសាងសំណុំរឿងបញ្ជូនទៅតុលាការតាមនីតិវិធី។ ដោយឡែកការសម្រេចបែបណានោះ គឺស្ថិតនៅលើតំណាងអយ្យការជាអ្នកធ្វើការសន្និដ្ឋានថ្លឹងថ្លែង ត្រូវចោទប្រកាន់ឬក៏អោយត្រឡប់មកវិញ មានសេរីភាពតាមច្បាប់ ៕
ដោយ ៖ សិលា
